Bateragune auzia salatzeko asmoz, astearte honetarako, uztailak 5, mobilizazioak deitu dituzte herri askotan eta nazioartean ere ekimen ezberdinak burutuko dituzte epaiketa salatzeko, epaituen askatasuna aldarrikatzeko eta Euskal Herrian zabaltzen ari den prozesu politikoari bultzada emateko. Besteak beste, Sopelan, 19:30ean jarri du hitzordua udaletxeko plazan Eleak mugimenduak. Algortan, berriz, 20:00etan batuko dira Telletxe plazan, eskubide zibil eta politikoen aldeko erakundearen ekimenez. Bitartean, gaur goizeko 10:30ean ekin diote berriro Espainiako Auzitegi Nazionalean Arnaldo Otegi, Rafa Diez, Miren Zabaleta, Arkaitz Rodriguez, Sonia Jacinto, Txelui Moreno, Amaia Esnal eta Mañel Serraren aurkako epaiketa. Gaurko saioa garrantzitsua izan da Batasuna berriro osatzeko lanetan zebiltzala dioten txostenak egin zituzten Poliziaren perituek deklaratu dutelako. Frogarik gabe, horien susmoetan oinarritzen da Fiskaltza epaiketarekin aurrera egiteko. Argazkian, ekainaren 27an ere egin zuten elkarretaratzea Sopelan / © Sopela.net.
Operazioan atzemandako txosten politikoen irakurketa egin zutela adierazi du lehen polizia-perituak, baina Iñigo Iruin abokatuari erantzunez, txosten horien azterketa perizialik ez zutela egin onartu du. Kontraesan argietan erori da azken polizia-peritua. Esan du, ETAk ez zuela amaitutzat jo ezker abertzalearen baitan emandako eztabaida, eta bide politikoei soilik eutsi nahi zietenekin haserretu zela, tartean auzipetuak. Epaiketak bihar jarraituko du, 10:00etan. Etzi ondorioak aurkeztuko dituzte bi aldeek, eta etzidamu azken txostenak eta azken hitzak esango dituzte.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun