Musikari danimarkar batek (Carl Winther) eta bi suediarrek (Joel Illerhag eta Johan Kolsut) osatzen dute Carl Winther Trio. 2006ko udan ekin zioten elkarrekin jotzeari, eta berehala ohartu ziren zerbait berria eskaintzen zutela. Indar handiko eta sormen biziko taldea osatu dute eta 2009an grabatu zuten aurreneko diskoa, "Contact", Carl Wintherek idatzitako abestiekin. Haien musikan eragina izan du hard bop estiloak, baita euren herrialdeetako paisaia soinuek ere. Hirukote garaikideen kutsua bereganatu dute, Brad Mehldau eta E.S.T. taldeena kasu, baina garrantzitsuena da haien berezko estiloa dutela, bai konposatzen bai interpretatzen.
Melquiades Quartet taldeari dagokionez, sormenarekiko eta askatasunarekiko maitasuna komunean duten lau artista elkartzearen ondorioz sortu zen proiektua da. Kultura anitzen musika tradizionaletik abiatuta sortzen du laukoteak herri-melodien errepertorioa, zuzenean interpreteen bihotzera heltzeko gai baitira, eta horien bitartez, baita entzuleen bihotzera ere. Balkanak, Portugal, Eskozia eta Argentinako erritmoak nahasten dute jazz, rock eta inprobisatutako musikarekin. Haiek sortutako konposizioak ere badituzte.
Suedia eta Danimarkako Carl Winther Trio taldeak irabazi du Getxoko Nazioarteko Jazzaldiaren 35. edizioaren Talde Lehiaketa. Bigarren saria Melquiades Quartet laukote frantziarrak eskuratu du eta, Matthieu Cahadevillek, azken talde horren saxo jotzaileak, bakarlari onenaren saria jaso du. Publikoaren sariari dagokionez, ikus-entzuleek Sorin Zlat Trio talde errumaniarra saritu dute eta Matthieu Chedeville saxo-jotzailea hautatu dute bakarlari onena. Horrela, musikari frantziarrak bakarlari onenari emandako bi sariak eskuratu ditu. Talde Lehiaketaren irabazleek 3.000 euro jasoko dituzte eta CD bat grabatuko dute. Gainera, gaur, uztailak 5, berriro aritzeko aukera izango dute Algortako Biotz Alai plazan, 21:00etan, Branford Marsalisen aurretik. Halaber, irabazleek Hoeilaart-eko (Belgika), Eivissako, Palmako eta Elorrioko jazzaldietan parte hartuko dute, Getxoko Jazzaldiak horiekin duen lankidetza-hitzarmena dela medio. Bestalde, bigarren saria lortu duen taldeak eta bakarlaririk onenak 1.200 eta 600 euro jasoko ditu, hurrenez hurren. Publikoaren sariei dagokienez, irabazleek oroitzapenezko garaikurrak jasoko dituzte. Argazkian, Carl Winther Trio / © Getxoko Kultur Etxea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun