Eleak eskubide zibil eta politikoen aldeko erakundearen deialdiari erantzunez, 60 bat lagunek egin dute gaur arratsaldean elkarretaratzea Algortako Telletxe plaza inguruan. Modu horretan, Espainiako Auzitegi Nazionalean Arnaldo Otegi, Rafa Diez, Miren Zabaleta, Arkaitz Rodriguez, Sonia Jacinto, Txelui Moreno, Amaia Esnal eta Mañel Serrari egiten ari zaizkien epaiketa salatu dute bildutakoek. Bitartean, Bateragune auziko fiskalak aldaketak iragari ditu gaur zigor eskaeretan, Berria.info agerkariak zabaldu duenez. Bihar jakinaraziko du zer zigor eskatzen duen auzipetuentzat, baina orain arte eskatu ez duena izango da. Defentsako abokatuek gaur esateko eskatu dute, baina fiskalak erantzun du eskaeretan aldaketak egin behar dituela eta horretarako denbora behar duela.
Iñigo Iruin abokatuak estu hartu du gaur 19.242 zenbakiarekin identifikatzen den Polizia peritu nagusia. Euskal Herriari buruz Polizian dagoen aditu handienetako bat da polizia hori, hainbat makrosumariotan deklaratu duena, baina gaur Iruinek bere hitzak kolokan jarri ditu, poliziak berak bere tesiak hipotesiak direla eta ezker abertzalearen presioak "nolabait agian" ETAk inor hil ez zezan lagundu zuela onartu duen arte. Frogarik ez dagoenez, hipotesi horiek ziren akusazioaren oinarri sendoena.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun