Getxoko Udalak "Zabaldu euskararen atea" izeneko kanpaina jarri du martxan bigarren urtez. Horren bitartez, arduradunek udalerriko euskararen erabilera "biziberritu" nahi dute. Beren jardueraren testuak euskaraz ipini nahi dituzten establezimenduei eta langile autonomoei erraztasun eta abantaila gehiago eskaintzeko, tokiko Udalak aipatu errotuluak egiten dituzten bederatzi enpresen zerrenda eskainiko die interesatuta daudenei eta, horrekin batera, deskontu bereziak egingo dieten beste sei enpresa ere. Horiek honako hauek dira: Kiser, Amets, Rotulos Arriluze, Toldos y Persianas Murgia, Rotulos Publiarte, Cianoplan, Uliarte Persianas, La Repro eta Kalko. Azken seiek, errotulua euskaraz jartzeagatik, %10eko deskontu gehiago egingo dute eta, elebidunez ipintzeagatik, %5 gehiago. Euskara Zerbitzuak merkatariei errotulua jarri aurretik beraiekin harremanetan jartzea gomendatzen die, akats gramatikalik duen errotulurik ez baita diruz lagunduko. Argibide gehiago lortzeko deitu 944 660 010 telefono zenbakira. Argazkian, eskuman, Koldo Iturbe Euskara zinegotzia aurretik egindako Gidabaimena Euskaraz kanpainaren aurkezpenean / © Getxoko Udala.
Udalak, 2002az geroztik, diru-laguntzak ematen dizkie udalerriko establezimenduei eta, 2009tik aurrera, langile autonomoei ere. Diru-laguntzak errotuluak, toldoak eta ibilgailu komertzialen testuak euskaraz jartzeko bultzatzeko dira. Orain arte, 149 errotulutarako diru-laguntzak eman ditu Udalak, hau da, 45.999 euro. Errotuluak euskara hutsez ipintzekotan ordaindu beharreko zenbatekoaren %50eko diru-laguntza (gehienez, 360 euro) izango da eta euskaraz eta gaztelaniaz jartzekotan kostuaren %30eko diru-laguntza (askoz jota, 180 euro), beti ere euskarazko testuak lehentasuna badu.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun