Bestalde, talde gazteek garrantzi handiko lekua izan dute aurten ere Algortan. Talde Lehiaketa horren erakusle izan da. Aurtengo ekitaldian, Espainiako, Errumaniako, Suedia-Danimarkako eta Frantziako taldeak iritsi dira finalera. Maila handia erakutsi ondoren, Carl Winther Trio suediar-daNImarkar hirukotea nagusitu zen lehiaketan. Azken urteotan talde hori ipar-europako jazz-eszenan nabarmendu da, nahiz eta bere kideak oso gazteak izan. Bestalde, Frantziako Melquiades Quartetek bigarren saria eskuratu zuen eta horren saxo-jotzaileak, Matthieu Chedevillek, bakarlaririk onenari ematen zaion saria ere irabazi zuen.
Hirugarren Milurtekoa sailean ere eskaintza anitza izan da. Bost egunetan zehar, Algortako Telletxe plazak beste horrenbeste kontzertu hartu ditu. Horien artean, Quartetto Minimo, Evgeny Ring Quartet, Santi Colomer Quartet eta Miguel Fernandez banda gazteak aritu ziren, Manel Campen eskarmetu handiko piano-jotzailearen saioa ahaztu gabe. Matthew Simon, Horacio Fumero eta Lluis Ribalta musikariekin jardun zen eta kontzertu bikaina eskaini zuen.
Bestelako jarduerak
Ohi bezala, kontzertu nagusiak amaitu eta gero, jam session saioak izan dira Algortako The Piper's taberna irlandarrean. Bertan, Jon Urrutia Band aritu da hiru egunez, jazzaldian parte hartu duten hainbat musikarik lagunduta, musika inprobisatua eskaintzen. Halaber, kaleetan ere egon da jazza Marmara Marching Band taldeari esker. Taldeak hainbat desfile egin ditu bost egunetan zehar eta Getxoko eta Bilboko kaleak alaitu ditu dixie erritmoez. Azkenik, Satistegi kafean Ricardo Carrillo de Albornoz argazkilariaren erakusketa egon da. Bertan, artista handien irudiak ikusteko aukera izan dute bisitariek.
Musikaz beteriko bost egunen ondoren, Getxoko Nazioarteko Jazzaldiak atzo eman zion amaiera bere 35. ekitaldiari. Uztailaren 1etik 5era, 15.000 lagunek gozatu dute kontzertuez, jam session saioez eta beste zenbait ekitaldiz, Getxoko Kultur Etxeak emandako datuen arabera. Aurten ere, kalitatea eta aniztasuna izan dira jarduera honen ardatz nagusiak. Halaber, talde gazteen aldeko apustuari eutsi dio Getxo Jazzak. Horrela, musikari ospetsuak ez ezik, Talde Lehiaketako eta Hirugarren Milurtekoa saileko banda gazteak ere aritu dira Algortan. Era askotako taldeak eta estiloak izan dira kontzertu nagusietan. Publikoak erantzun bikaina eman dio jaialdiaren musika eskaintzari eta kontzertu bikainez gozatu ahal izan du. Lehenengo bi egunetako kontzertuek asebete utzi zuten publikoa bi musika eskaintza originalen eta oso ezberdinen eskutik: batetik, Aki Takase eta bere New Blues proiektua eta, bestetik, Lee Ritenourren fusion-jazz-a. Bide erdia bete zuen jazzaldiak nazioarteko jazzaren kontrabaxu-jotzaile ospetsuenetariko baten kontzertuaren eskutik: Dave Holland, hain zuzen ere. Astelehenean, Chucho Valdesek eta The Afro-Cuban Messengersek Biotz Alai plaza bete zuten jazz latinoaz baliatuta eta, azkenik, atzo bertan Branford Marsalisek gauza bera egin zuen, saiorako sarrera guztiak agortu zirela. Argazkian, Branford Marsalis atzoko saioan / © Getxoko Kultur Etxea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun