Bilboko uretan egingo dute lehendabiziko aldiz Club Deportivoren igeriketa-zeharkaldia
Club Deportivoren igeriketa-zeharkaldiaren 72. edizioa Bilboko uretan egingo dute, lehendabiziko aldiz. Larunbat honetan, uztailak 9, izango da proba, goizeko 11etan abiatuko da, Uribitarteko pantalanetik abiatuta. Lehenengo edizioa 1934an jokatu zen, Abrako uretan, baina 1971ean azken aldiz egin zuten. Industrializazioaren ondorioz, itsasadarrak metatutako kutsadura hazten zihoanez, proba Lekeitiora eraman zuten, eta bertan jokatu zuten 1998ra arte. Urte horretan, Club Deportivoren "Itsasbidea igeriz" izeneko zeharkaldia Algortako Ereaga hondartzan egin zuten, eta horrela jarraitu zuen 2006ra arte. Izan ere, kokapena berriro lekuz aldatu zuten, zehatz-mehatz, Plentziara. Uribe Kostako itsas hiribildu horretan, "Itsasbidea igeriz" probak inoiz izandako parte-hartzaile kopuru handiena hartu zuen, guztira 450 igerilari. Argazkia: cc-by rasbcn.
Itsasadarra berroneratzeko prozesu luze eta neketsuaren ostean, orain "agertoki ezin hobea daukagu" horrelako ekitaldiak burutzeko, Club Deportivoko arduradunen ustez. Gauzak horrela, zeharkaldia jatorrizko kokapenetik gertu egitea erabaki dute. Lehiaketak proba bi dauzka. Lehenengoa, goizeko 11etan hasiko da, 680 metroko ibilbide batekin. Bertan, kirol modalitate horretako (14 urte arteko) gizonezko zein andrazko promesak izango dira. Jarraian, distantzia horretako gainerako kategorien txanda izango da. Bigarren probari dagokionez, luzeena (2.380 metro), goizeko 11:30ak inguru hasiko da. Bertan, andrazko senior, master eta beteranoak gehi ezgaitasunak dituzten kirolariak egongo dira. Bost minutu beranduago gizonezko senior, master eta beteranoak abiatuko dira.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun