Mungiako Sabeco supermerkatuko zuzendaritzak langileenganako duen jarrera salatu du Uribe Kosta, Txorierri eta Mungialdea bere gain hartzen duen Ipar Uribeko LABek. Prentsa ohar baten bidez, sindikatuak lan zentro horretako langile baten "egoera larria" ezagutzera eman du. Emakumea, LABeko delegatua dena, "duela hiru urte lan istripua izan zuenetik, medikuz mediku eta epaitegiz epaitegi dabil, mutuak izandako kudeaketa txarra dela medio", sindikatuak zabaldu duenez. Gauzak horrela, arrandegian zuen lanpostua betetzeko bere gaitasuna erabakitzen den bitartean, langile hau birkokatzeari ezezkoa eman dio enpresak. Izan ere, LABek sei hilabete daramatza langilearen birkokapena eskatuz, "duintasunez lan egin dezan", emaitzarik lortu gabe. Horren aurrean, mobilizatzeari ekingo diote bihartik aurrera. Ostiralero, bihar hasita eta langile hori birkokatzea lortu arte, kontzentrazioa burutuko dute 12:30etik 13:30era Mungiako Simply Sabeco supermerkatuaren sarreraren aurrean. Argazkian, piketea Itzubaltzeta / Romoko Simply supermerkatuan greba orokor egun batean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun