Absolbitu egin dute Algortan Askatasuneko zozketak saltzera zihoalakoan zigortu zuten Lander Fernandez
Espainiako Auzitegi Gorenak absolbitu egin du Lander Fernandez Arrinda Santutxuko preso politiko ohia, EFE albiste agentziak zabaldu duenez. Auzitegi Nazionalak hiru urteko espetxe zigorra ezarri zion 2010eko urrian, zozketak saldu nahian, "ETA laguntzea" egotzita. Epaileek Guardia Zibilak eta Fiskaltzak sostengatutako bertsioa frogatutzat eman dute. Horren arabera, 2008ko abuztuaren 10ean, akusatua Algortako Portu Zaharreko jaietara joan ei zen, bertan Askatasuna erakunde ilegalizatuaren zozketak saltzeko asmoz edo. Bidean, baina, guardia zibilek gelditu eta 300 txartel atzeman zizkioten. Gorenaren arabera, ordea, "erakunde terrorista batentzat dirua biltzeko txartelak izate hutsa" ez da nahikoa kolaborazioa leporatzeko, helburua elkartasuna izatea ezin delako baztertu. Argazkian, 2008ko otsailean kalez jantzitako ertzainek bahitu zutela salatu zuen Lander Fernandezek / cc-by Askatu.org.
Gorenak froga argiagorik aurkeztu ez izana aurpegiratu dio Auzitegi Nazionalari. Epaileen ustez, ezin da hori gabe baztertu, Auzitegi Nazionalak egin zuen moduan, elkartasuna izatea zozketen helburua auzipetuak asmo hori frogatu ezin izan duelako.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun