Gotzon Alcalde preso politiko algortarra jipoitu egin zuten kartzelariek ostiralean Frantziako Fleury kartzelan, Askatasunak zabaldutakoaren arabera. Ostiralean bertan bete zuen Frantzian ezarri zioten espetxe zigorra eta Espainiara eramateko zain dago. Jipoitu ondoren mitardera eraman zutela gaineratu dute, 10 egunerako zigortuta. Askatasunak azaldu duenez, "berarekin zer eginen zuten jakin nahian, goiz osoa pasatu zuen informazioa eskatzen. Matoien isiltasunaren aitzinean, bazkaria ekarri ziotenean ziegatik atera zen. Hor jo egin zuten eta bortxaz berriro sarrarazi. Gero itzuli ziren bere ziegara, ahoa tapatu zioten oihal batekin eta jipoitu. Ondotik gibeletik esposatu eta mitardera eraman zuten. Barneko epaiketan, hor egoteko 10 egunez kondenatu zuten. Markak ditu, besteen artean besoetan eta bularrean, eta salaketa ezarriko du ahalik lasterrena". Gotzon Alcalde datozen edozein egunetan eraman dezakete Madrilera, errepresioaren kontrako erakundearen arabera, Frantzian ezarri zioten espetxe zigorra dagoeneko beteta duelako. Atzo Madrilen zegoeneko abisua jaso zuten, baina gaur goizean bere etxekoek esan diete Frantzian dagoela oraingoz. Argazkian, Gotzon Alcalderen irudia ezkerrean.
"Gotzonekin zer pasatu zen jakin nahian, bere D5eko kideek patioa blokeatu zuten ondoko igandean. Presondegiko zuzendariak Gotzonen gutun bat ekartzea lortu zuten. Gertakarien larritasunaz enteratu zirenean, haiek ere elkartasunez mitardera joatea erabaki zuten. Ondotik, D1 eta D2ko euskal preso politikoek erabaki berbera hartu zuten. Denak mitardean daude", gaineratu du Askatasunak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun