Martxa iruditan
Itzubaltzetako Emakumeon Asanbladak irakurritako komunikatua
Itzubaltzeta / Romo, eraso sexisten aurka!
Gure herrian, eraso sexistak ematen ari dira: bortxaketa bat, bortxaketa saiakera bat, jazarpenak, jarraipenak eta irainak. Honelako egoerak bizi izan dituzte hainbat emakumek Itzubaltzeta / Romon.
Alarma gorria piztu da Itzubaltzeta / Romon eta herritarrok ezin ditugu honelako eraso eta jarrerak onartu, emakumeok gure auzo zein herrietan aske bizitzeko eskubidea dugulako.
Honen aurrean adierazpenak egin nahi ditugu:
1. Instituzioei behar bezalako ardura har dezaten, benetako konpromiso politikoa, itxurak alde batera utziz. Nazkatuta gaude indarkeria kasuak jazoera isolatuak izango balira bezala tratatzeaz, gizarte arazo konplexu baten aurrean gaudela onartu beharrean.
2. Herritar guztion ardura da eraso sexistei aurre egitea, beraz gure inguruan ematen diren jarrera erasokorrak salatu eta erasotzaileak kanporatu behar ditugu. Erasoei tamainako erantzuna eman behar die herriak.
3. Emakumeok autodefentsaren bidez eraso sexistei aurre egin behar diegu, gure artean elkartasuna adieraziz eta erasoen aurrean salaketa irmoa eginez.
Asko dira emakumeok pairatzen ditugun bortxakeria eta baztertze egoerak, sistema patriarkal kapitalistaren emaitza direnak.
Sistema patriarkal kapitalistak baztertzen gaitu, emakumeoi menderatuaren papera izatera bultzatuz. Honen aurrean emakumeok antolatu beharrean gaude, autodefentsa feminista erabiliz.
Emakumeok gure herriko kaleetan libre bizi nahi dugulako eta horretarako eskubidea dugulako
Itzubaltzeta / Romo eraso sexisten aurka!
Itzubaltzetako Emakumeon Asanblada
Itzubaltzetako Emakumeon Asanbladak deituta, 100 bat auzokidek hartu du parte gaur arratsaldean herri horretan burutu den "Erromo herria eraso sexisten aurka!" lelopeko manifestazioan. Martxa, besteak beste, emakumeen aurkako erasorik garrantzitsuenak eman diren bi gunetik igaro da: Amalloa kalearen sarbidea, non 2010eko uztailaren 11n emakume bat bortxatu zuten; eta Santa Eugenia kaleko 18. zenbakiko lonja, bertan hiru emakume prostituitzera behartuta izan zituztela iaz. Halere, horrelako kasurik larrienak izan ez ezik, azken asteotan eman diren bortxaketa saiakera bat, jazarpenak, jarraipenak eta irainak ere salatu dituzte feministek. Horren aurrean, emakumeen autodefentsa bultzatzeko asmoz, autodefentsa ikastaroak egingo dituztela iragarri dute. Martxan, besteak beste, Maitane Nerekan eta Arantza Gutierrez Bilduko zinegotziak eta jai batzordeko, gaztetxeko eta herriko hainbat koadrilatako kideak izan dira.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun