Getxo Kirolak erakundeak mediku-azterketak egiteko zerbitzu berria jarri du martxan Algortako Fadura kiroldegian. Horrekin, aipatu erakundeak txekeo espezializatuak egingo dizkie egoera fisikoa nolakoa duten jakin nahi duten kirolariei. Horrez gain, gustuko kirolaren inguruko aholkularitza ere jasotzeko aukera emango du, hura zein intentsitatearekin praktikatu behar duten ere adieraziz. Zerbitzu hori, bereziki, honakoei zuzenduta egongo da: kirol-jardueretan parte hartzen duten bazkideei, federazioaren lizentzia lortzeko gaitasun-proba bat behar duten kirolariei eta, oro har, norberaren osasun-egoera ezagutu, ariketa fisikoa egitean organismoak nola erantzuten duen eta zein jarduera komenigarriena den jakin nahi duten pertsonei. Momentuz, zerbitzu berria astelehenetik ostiralera eskainiko dute, 16:00etatik 20:00etara. Interesatuek erreserba egin beharko dute 944 308 070 zein 944 045 151 telefono zenbakietara deituz edota makina automatikoetan Instalazioen Erreserbak izeneko atalean. Argazkian, kirolari bat mediku-azterketa batean / © Getxoko Udala.
Kirol-medikuntzaren arloa Kirolkuntza, SL enpresak kudeatuko du bi txekeo-mota eskainiz: oinarrizkoa, 20 minutukoa izango da eta orokorrean pertsonak kirol-jarduerarako duen gaitasun-maila hautemateko; eta datu biometrikoak, bihotzeko eta arnasketako auskultazioa, ikusmenaren azterketa, taupaden neurria eta elektrokardiograma egiteko. Irailean eskaintzen hasiko duten txekeo aurreratuan, aurreko proba horiez gain, esfortzu-proba ere egingo dute, hau da, muturreko esfortzu baten aurrean organismoak nola erantzuten duen jakiteko. Proba hori federatutako eta errendimenduko kirolarientzat gomendagarria da, eta baliozko ziurtagiria emango dute federazio guztietan lizentziak izapidetzeko, futbolekoan salbu. Bere iraupena 40 minutukoa izango dela aurreikusi dute arduradunek.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun