Itzubaltzetako jaietan izango da Berri Txarrak, abuztuan disko berria grabatu arren

Erabiltzailearen aurpegia Ukberri 2011ko uzt. 24a, 21:50

Abuztuan zehar bere zortzigarren diskoa grabatuko du Berri Txarrak talde euskaldunak Kaliforniako Venice Beach herrian, Ross Robinson ekoizle famatuak duen estudioan. Hori dela eta, ja 2012ra arte kontzerturik eskainiko ez zutela zabaldu zen, baina, azkenean, nafarrek haien zaleengatik errukia izan dute eta kontzertu bakan batzuk eskainiko dituzte datorren hilean, tartean bat eskualdean, Itzubaltzeta / Romoko jaietan. Abuztuaren 4an, ostegunarekin, izango da hori, txosnagunean. Aurten, gune hori Santa Eugenia kaleko parking-era, edo "Kabul"-era, lekuz aldatuko dute. Oholtzan, gaueko 11etan, bertoko Artaza Combat talde gazteak berotuko dio publikoa Berri Txarraki. Itzubaltzetarrek “Rock & Roll taupadak” diskoa kaleratu berri dute eta jai batzordeak maketarik onenaren saria eman die. Itzubaltzeta / Romoko jaiak abuztuaren 2an hasi eta 7an amaituko dira. Bitartean, goitibeheren igoera, play-back txapelketa, poteo rallya, bertso-jira, tortilla txapelketa, umeen jolasak, antzerkiak, herri bazkariak eta Ze Esatek, Romo´s Aires, Norte Apache eta abarren makina bat kontzertu izango dira. Argazkian, Berri Txarrak pasa den urtarrilean, Hatortxu Rock-en / cc-by-nc-sa Saioa Cabañas - Gauilunak.

Itzubaltzeta / Romora joaterik ez duenak aukera gutxi izango du beste nonbaiten Berri Txarrak ikusteko. Abuztuaren 6an, Galizian joko dute, Arzua herriko Festa Dos Botes jaialdian. Euskal Herrian bertan beste hiru abagune baino ez dira izango: abuztuaren 14an Donostiako Aste Nagusian, hurrengo egunean Tafallako txosnetan eta hilaren 16an Gernikako festetan.

Honenbestez, taldeak iragarri du “Payola” biraren azkenak izango direla aipatutako kontzertuak, eta 2012ra arte ez dela izango Berri Txarrak zuzenean ikusteko beste aukerarik. “Payola” kaleratu zenetik (2009ko Iraila) munduan barna ehun kontzertutik gora eman ditu hirukoak, osotara 17 herrialde iragan dituen bira erraldoia bitarteko (AEB, Japonia, Hego Korea, Txina, Brasil, Argentina, Txile, Uruguai, Mexiko, Kanada, Alemania, Frantzia eta abar).

Gainera, aste honetan Independent Music Awards sarietan "Vox Pop" golardoa jaso dute. Berri Txarrak taldearen "Folklore" kantuak punk abesti onena jo baitzuten musika zaleek. Publikoaren esku geratu den sari hori hautatzeko, mundu osoko 57.000 entzuleren botoak izan zituzten kontutan.

Itzubaltzeta / Romoko jaien egitaraua

Kultura Getxo
Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.

Egin zaitez HIRUKAlagun eta gozatu euskaraz!


Izan zaitez HIRUKAlagun