Felix Arnaiz Maeso "Lagun" 20 urteko gazte leioaztarra zena omendu dute gaur goizean Itzubaltzeta / Romoko 300 bat auzokidek, bertako jaiak martxan jarri eta ordu gutxitara. Itzubaltzeta / Romo eta Pinuetako jai batzordeak eta Ahaztuak 1936-1977 elkarteak antolatutako ekitaldia (mp3, cc-publicdomain Koska irratia) Arnaiz hil zuteneko 42. urteurrenean burutu da. Francoren garaiko Getxoko udaltzain batek erail zuen tiro batez antzinako trenbidearen barreren inguruan, gaur ekitaldia egin duten lekua. Errekagane eta Ibaiondoko kale-kantoian, Felixen memoria gorde eta omentzeko errotulua jarri dute, auzokideen txaloen artean. Lore eskaintza ere egin diote herriko gazte, heldu zein edadetu koadrilek eta senideei ere maitasuna eta elkartasuna adierazi diete herriko dantzariek. Martxelo Alvarez Ahaztuak elkarteko kideak tragedia ikusi zuten edo horren lekukotasunik izan duten auzokideei deitu die "zigorgabetasuna eta isiltasuna apurtzera" eta egun horretan gertatu zena guztiz argitzeko. Jai batzordeak Felix Arnaiz gogoratuko du urtero. Argazkian, "Lagun"-en ama dantzari baten eskuetatik lore sorta jasotzen.
1969ko abuztuaren 2an, Felix Arnaiz Maeso koadrilakoekin zebilen Itzubaltzeta / Romoko jaietan, abesten eta txantxa giroan. Zoritxarrez, "Leza" izenordez ezaguna zen Getxoko alkateordea inguruan zen eta txarto hartu zuen Arnaizen eta lagunen poztasuna. Berak udaltzainei deitu eta giroa nahasi zen. Hainbat ordutan lekutik aldenduta ibili ostean, gazteak jaietara bueltatu ziren eta orduan hiru tiro bota zieten udaltzainek. Bi tiro desbideratzea lortu zuen atxilotuta eraman zuten mutil batek. Hirugarrenak, ordea, Felix hil zuen. Gaur mantentzen den bertsio ofizialaren arabera "istripuz" hil zen. Ez zen ikerketarik ezta epaiketarik ere egon, salaketa ken zezan familia xaxatu baitzuten. Egun ere, instituzioek ez dute Felix Frankismoaren biktimatzat aintzat hartzen.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.