Plentzia ta Gorlizko gazte asanbladak zabaldutako adierazpena:
Eskerrik asko gerturatu zareten guztioi.
Gaur, Andra Mariko jaien osteko egun honetan, Plentzia eta Gorlizko gazteok mezu batez altxatu gara: Ermitatze gaztetxea desalojatzen ari dira!
Indar errepresiboak 9:30ean sartu dira gure etxea izan den topaleku horretan, Antolin Deuna plazan dagoen gune parte hartzailean, alegia.
Egun hau, ordutik, ez da egun ona izango. Eraso zuzena jaso dugu, denok, baina ez gara kikilduko.
Gaur ere herriaren elkartasuna jasotzen ari gara. Mila esker izandako jarreragatik. Esfortzu gehiago eskatuko dizuegu baina.
Asko izan dira aurrera eramandako ekimenak, proiektuak, tailerrak: inauteriak, gazte egunak; dantza, bitxi, txalaparta eta abarreko tailerrak; bideo forumak; umeentzako jolasak; afariak... Laburbilduz, herri honetako gazteriak herri honen agenda bete du aisialdi alternatiboaz eta filosofia parte-hartzaileaz.
Jarrerak eskertu ditugu, eskaerak bota ditugu, baina salatu ere egin behar dugu.
Berriro ere Udalak huts egin digu. Garaiz zaudete, egoeran zeresanik baituzue. Zuen erantzukizuna ere bada.
Ez al duzue sustatu gazteentzako topalekua edo nagusientzako etxea?
Alderdi politikoen adierazpenen zain gaude, nahiz eta hainbestetan huts egin, izandako ibilbidea zuzenduko duzuelakoan gaude.
Zuen utzikeria eta pasibotasunagatik berriro ere kale gorrian gaude.
Baina proiektuarekin ez dute bukatuko. Horregatik, gure agendarekin jarraituko dugu.
Gaurtik aurrera eta ostegunera arte Astilleron egongo gara kanpaldian. Bertan egingo dugu astearteko afari goxoa eta asteazkenean bideo emanaldia egingo dugu han bertan.
Azkenik, gure elkartasuna arrisku berean dauden Euskal Herriko erreferentzia diren gaztetxeei.
Kukutza eta Itzubaltzeta aurrera!
Ermitatze aurrera!
Gora Plentzia eta Gorlizko gazteria!
Ermitatze gaztetxea hustearen kontrako manifestazioa
Plentzia Telebistak (PTB) ekoiztutako bideoa (© Plentzia Telebista)
Ertzainek eta udaltzainek goizean Ermitatze gaztetxea hustuarazi ostean, berrehun bat uribekostarren babesa jaso du arratsaldean Plentzia ta Gorlizko Gazte Asanbladak. Arratsaldeko 7:30ean Piruli plazatxotik abiatuta, itsas hiribildu plentziarreko kaleak zeharkatu dituzte bildutakoek, "Herri bat, gaztetxe bat!" eta "Okupazioa ez da delitua!" leloak aldarrikatuz. Gaur arte tokiko gune autogestionatua ere izan den etxetik ere igaro dira, Astillero plazara heldu aurretik. Orduantxe alde egin dute bertatik langileen hormatze lana zaintzen ibili diren Ertzaintzaren bi patruilek. Udaletxe aurrera iritsita, beraien proiektuaren zilegitasuna irmoki defendatu dute gazteek; baita aurrera jarraitzeko asmoa agertu ere. Ostegunean Gorlizen egingo duten Gazte Egunera arte, bertan egongo dira kanpatuta, eta bertan egingo dituzte afaria eta bideo emanaldia, bihar eta etzi.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun