"Eusko gudariak" abestu ondoren, brindis bat egin dute preso guztien eta Euskal Herriaren askatasunaren alde. Aitor Artetxek bere argazkia kendu du tabernaren paretatik eta bertan gelditzen diren lagunei begira egon da une batez. Argazkia erakutsi, jendea agurtu eta besarkada eta berriketa artean abiatu da gaueko giro amoltsuan.
Aitor Artetxeri harrera (cc-pd Etengabe)
Arratsaldeko 6ak inguruan atera zen atzo Aitor Artetxe Rodriguez preso politiko algortarra Aranjuezeko espetxetik behin behineko askatasunean, hilaren 1ean eta 15ean epaitegira aurkezteko baldintzapean. Goizaldeko ordu biak baino lehenago iritsi da Algortara, Etengabe bitakorak azaldu duenez. Amnistia tabernan zain zituen ehun lagun inguru, tartean berarekin kartzelan izandako kideak; eta iritsi denean, harrera beroa egin diote, gaueko isiltasuna urratu duten txaligu, klaxon, oihu eta agurren artean, bengala gorrien argipean. Lehenengo besarkaden ostean, loreak eskaini, aurreskua dantzatu, bertsoak bota eta Amnistiaren Aldeko Mugimenduaren ordezkariaren hitzen ostean, Artetxek eskerrak eman eta barruan gelditu diren guztiak izan ditu gogoan, aurrera segitzeko eta egunero lanean jarduteko beharra azpimarratuz. Argazkia: cc-pd Etengabe.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun