Partida egutegiari dagokionez, Bryce Bevin-en jokalariek Cajasol Ciencias andaluziarren kontra izango dute Ligako lehendabiziko norgehiagoka, irailaren 18an, Sevillan. Ondorengo partidak ere ez dira samurrak izango hori-beltzentzat: iazko txapeldun La Vila, VRAC eta AMPO Ordizia izango dituzte aurkari. Gipuzkoarrak dira iazko txapeldunordeak. Hala ere, berrikuntzekin dator aurtengo Liga. Lehenengo sei sailkatuek izango dute txapela irabazteko aukera: lehenengo biak zuzenean igaroko dira finalerdietara eta gainontzeko lauek aurretiko kanporaketa bat jokatu beharko dute.
Errege Kopa
Kopa txapelketak ere formatu berria izango du aurten: aurretiko kanporaketa jokatu beharko dute hiru multzotan banatuta bederatzi taldek. Multzo bakoitzetik onena igaroko da finalerdietara, La Vila zuzenean sailkatuta dagoela. Getxo Artea Rugby Taldeari B multzoa egokitu zaio, Cetransa El Salvador eta Cajasol Ciencias arerio dituela. Emakumezkoen Ohorezko Mailari dagokionez, urriaren 23an izango dute lehendabiziko norgehiagoka Getxo Rugbyko neskek, Faduran, Complutense Cisneros taldearen kontra.
Ohorezko Mailan denboraldi gogorra datorkiola ikusita, Jack Bentall 25 urteko jokalari ingelesa fitxatu du Getxo Artea Rugby Taldeak. Birmingham & Solihull Bees taldeko jokalari ohia Bath, Cleve, eta Newbury klubetan ere ibili da. Hirugarren lerroan aritu arren, bestelako posizioetan jokatzeko arazorik ez dauka Bentallek (1,89 metro / 98 kg). "Oso bizkorra da, baloia mugitzen trebea eta joko ikuspegi ona du. Horretaz gain, plakaketa egile trebea da", Getxo Rugbyko arduradunek adierazi dutenez. Ingelesak, bere aldetik, hori-beltzekin aritzeko "gogo ikaragarriak" dituela nabarmendu du, "Espainiako Rugby Ligan talde getxoztarra gorenera eramateko asmoz". Bitartean, dauzkan hiru jokalari zeelanda berritarrak taldean jarraituko dute iragartzearekin batera, aipatu herrialdeko Vinnie Booiman erdilaria (1,84 metro eta 94 kilo) ekarriko du Getxo Rugbyk. Azkenik, talde getxoztarrean jarraituko du gutxienez urte batez Bittor Aboitiz Espainiako selekzioan izandako harroina. Argazkian, Jack Bentall / © Getxo Artea Rugby Taldea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun