Bi gazte atxilotu dituzte Getxon kutxazain automatikoak manipulatu eta bezeroen diruaz jabetzea egotzita
Getxoko Udaltzaingoak bi gazte atxilotu zituen pasa den astean Santander banketxeak udalerrian dituen zenbait kutxazain automatiko manipulatzea egotzita. Udal iturrien arabera, ustezko gaizkileek kutxazaineko dirua jasotzeko zirrikituaren gainean forma berdineko metalezko pieza bat ipintzen zuten erabiltzaileek eskatutako dirua ateratzea galarazteko. Dirua kutxazainetik kanpo geratzen zen, baina billeteak atera ez zitezen, itsasgarriarekin finkatutako irtengune faltsuak ezkutatuta. Gezurrezko irtengunea kenduta, bi gazteek dirua hartzen zuten, azaldu dutenez. Aipatu banketxearen Algortako bulegoko zuzendaritzakoek ohartuta, Udaltzaingoak banketxeak zaintzeko jarduna hasi zuen pasa den astean.
Horren ondorioz, pasa den abuztuaren 11n, kalez jantzitako udaltzainek jokaera susmagarria zuten bi gazte ikusi ei zituzten Itzubaltzeta / Romoko Santander banketxeko bulegoaren inguruetan. Tokiko poliziek ikusi zuten bi gazteek bertako kutxazain automatikoa manipulatzen zutela ezelako eragiketarik egin gabe eta bertara bueltatzen zirela erabiltzaileek eskatutako dirua lortzen ez zutela hurbiletik ikustean, udal iturriek aipatu dutenez. Poliziak bi gazteak atxilotu zituen kutxazainean blokeatutako dirua jasotzerakoan. Era berean, kutxazainak manipulatzeko eta ingurutako lorategi batean ezkutatuta zuten materiala atzeman zieten. Bi gazteak, A.P. eta C.I., 26 eta 22 urtekoak, hurrenez hurren, eta biek ala biek polizi aurrekariak dituztela, epailearen aurrera eraman zituzten. Getxoko Udaltzaingoak gutxienez udalerriko hainbat banketxetan egindako era honetako zazpi ekintza leporatzen die.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun