Abuztuaren 26an, ostiralarekin, herri bazkaria egingo dute. Apuntatzeko orria (10 euro) La plaza tabernan egongo da, hilaren 24ra arte. Bazkari goxoa prestatzeko animatuz gero, goizeko 10etan aurreko taberna berdinean lotu dira. Arratsaldean, berriz, La Plaza tabernan 20:30ean hasita, tabernaz-taberna herri osoan ibiliko da Kantagunea. Gauean, ordea, Los Chicos del Maiz eta Hesian musika taldeak arituko dira.
Bertsoak, kontzertuak eta ur gerra
San Agustin jaien azken txanpara helduta, larunbatean, ur gerra galanta izango da kiroldegi inguruko plazan (Europa plaza), eguerdiko 12etan hasita. Ondoren, arratsaldeko 8etan, Jon Maia, Onintza Enbeita, Andoni Egaña eta Iratxe Ibarraren bertso saio futurista izango dute gozagarri Irailaren 23a plazara hurbiltzen direnek. Geroago, txosnetan, Zea Mays eta Bongo Botrako taldeek eskainiko dituzte kontzertuak, gauez. Hurrengo egunean, igandea, bi erromeria egongo dira herriko plazan zein txosnetan. Izan ere, lehenengoan, Aiko taldea arituko da arratsaldeko 7:30ak aldera. Bigarrenean, berriz, Izargi talde gazteak jardungo du gauerdian. Amaitzeko, astelehenean, jaiei amaiera emateko proba eta jolas ugari egongo direla jakinarazi dute Berbotsekoek. Ekitaldi horietan zein gainontzekoetan parte hartzeko, jantzi zuri-urdina jartzera deitu dituzte herritarrak euskara elkartekoek. Izan ere, Berbotsekoek esaten duten bezala: "Guk ez badugu egiten, nork egingo du?".
Uda borbor dagoela, abuztuaren 25etik 29ra ospatuko dira San Agustin jaiak (ikusi egitarau osoa udal agendan / pdf) Altzaga herri erandioztarrean. "Aurten ere, euskaltzaleen parte-hartzea ezinbestekoa izango da gure herria gero eta euskaldunago egiteko", adierazi dute Berbots Erandion Euskaraz elkarteko kideek. Gauzak horrela, plan ederra proposatu diete tokiko zein gertuko euskaldun eta euskaltzaleei. Hasteko, jaien lehenengo egunean, ostegunarekin, berbots-bazkaria egingo dute. Ohi bezala, La Plaza tabernako arkupean egingo dute. Aipatu establezimenduan egongo da izena emateko aukera (10 euro), hilaren 22ra arte, astelehena. Hantxe ere jarri dute hitzordua bazkari egunean, 11:00etan, den-dena prestatzeko. Bazkal ostean, berriz, Hegoaize folk taldea ere izango da eurekin, ahaztu barik 13:00etan plazan txupinazoa izango dela. Bestalde, arratsaldez, 21:00ak aldera, parrillada ederra egingo dute txosna gunean. Argazkian, Kantagunea Altzagan barrena.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun