Bizkaiko Okupazio Mugimenduaren oharra:
Orain dela hiru urte espekulazioaren burbuilak eztanda egin zuen, berarekin hiri modernoen bandera-ontzi zena irauliz, espekulazioa hain zuzen ere. Ordutik inperioaren ontzidiak norabidea indartu duela ikusi dugu, guztion artean poliki -poliki eraiki ditugun irlatxoekin bukatu nahian.
Irla hauek gaztetxeak dira. Justuagoa den jendarte bat sortzeko guneak, non eta desberdinak zein parekoak izaten ikas dezakegun, zer zarena, daukazuna baino garrantzitsuagoa den lekua.
Gune hauen gehiengoak gune okupatuak dira. Kortsarioen eta ontzidi inperialisten eskutik Herriak berak berreskuratuak. Jabego pribatuaren gehiegikeriaren eta gune autogestionatu ezaren arteko gatazka azaleratzen duten espazioak dira.
Azkenengo hilabeteotan desalojo-bolada bat jasan dugu, eta okupazio mugimenduarekin bukatzea helburua duen ekaitz errepresibo bat dator, horrela gazteok desmasia bat den inposatutako sistema honen aurrean, autoantolakuntzan eta alternatibak eskaintzen jarraitu ez dezagun.
Desalojatuak edo erasotuak izan diren La Komi, Iralako Gazte lokala, Ermitatze Plentzian, Koskoenea Portugaleten, Zalla edo Kukutza III gaztetxea freskoen ditugun adibideak dira.
Ez gara galernen eta ontzidi ikusgarrien beldur. Korrontearen kontra igeri egiten jarraituko dugu, ur nahastuetan murgiltzen eta ez dugu inoiz dudarik izango kai abandonatuak abordatzerako orduan, noizbait nahi duenak porturatu dadin.
Gure Itsasadar maiteko kai polit honetatik, datorren abuztuaren 25ean, osteguna, arratsaldeko 17.00etan, gaztetxeen defentsan bustitzeko egiten dugu deia Bilboko Plaza biribilean.
Ah, eta ekarri ezazue gero izango ditugun ezustekoentzako arropak, Kulturgunean sikoblok proba eta errekaren okupazioa izango baitugu!
Gehitu nahi genuke, Komantxek, Bilboko Okupazio Mugimenduaren konpartsa den heinean, Aste Nagusian izango dugula, eta danok gonbidatuta zaudetela txosnan porturatzeko.
Eskerrik asko.
Manifestazioaren kartela
Ermitatze, Itzubaltzeta eta Kukutza gaztetxeen aldeko martxa izango da ostegunean Bilbon
Datorren ostegunerako, abuztuak 25, gaztetxeen aldeko lurralde manifestazioa deitu du Bilboko Okupazio Mugimenduak (BOM). Aste Nagusiko ohiko hitzordua bilakatu den ekimena arratsaldeko 5etan abiatuko dute, Bilboko Plaza Biribiletik. Martxaren bidez, "azkenengo hilabeteotan hainbat gaztetxek eta gune liberatuk jasan" duten "sistemaren errepresioa" salatu nahi bide dute. Besteak beste, Uribe Kostari dagokionez, Plentziako Ermitatze gaztetxearen itxiera eta Gobela ibaiaren uholdeen aurkako plangintzaren harira Itzubaltzetako gaztetxea desjabetua izateko mehatxuaren aurka azalduko dira. Horiekin bat, Portugalete, Zalla, Durango, Santutxu, Irala, Busturia, Ordizia, Gasteiz, Gros edo Arriagako gazte lokalak, gaztetxeak eta etxebizitza okupatuen aurkako ekimenak salatuko dituzte. Azkenik, Euskal Herriko gaztetxerik handiena, Kukutza gaztetxea, babestera deituko dute. Egun osoan zehar hainbat ekimen izango da. Besteak beste, gazte asanbladen herri bazkaria, errekaren okupazioa, sikoblok-a delakoa, kontzertuak eta abar. Argazkian, atzo BOMek emandako prentsaurrekoa / © Kukutza gaztetxea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun