Gaur arratsaldeko 5etan Gernika-Lumoko Urbieta zelaian abiatuko du aurredenboraldia Getxo Artea Rugby Taldeko mutilen lehenengo taldeak. Izan ere, lagunarteko partidaren arerioa Bizkaia Gernika izango da, historikoki getxoztarrentzat talde zaila izaten dena. Gainera, basurdeek hainbat jokalari berri kontratatu dituzte, tartean atzo bertan aurkeztu zituzten Marvin Swartboi hegoafrikarra eta Lilian Pereira frantsesa. Aurretik, 15:30ean, beste derbi bat izango da, bi eskuadren bigarren taldeen artean. Gernikako partidaz gain, beste lau norgehiagoken bidez gauzatuko dute aurredenboraldia getxoztarrek. Ostegunean eta igandean, hilak 25 eta 28, entsegu bikoitza izango dute Faduran Portugalgo Coimbra hiriko taldearen aurka. Irailaren 3an eta 10ean, berriz, beste bi derby jokatuko dituzte. Lehenengoa Elorrion izango da, AMPO Ordiziaren aurka. Bigarrena, ordea, etxean jokatuko dute Bidarteko Union taldearekin. Azkenik, Ohorezko Mailako lehenengo partida irailaren 18an Faduran izango dute Bryce Bevinen mutilek, Andaluziako Cajasol Ciencias taldearen aurka. Emakumeen taldea beranduago hasiko da Ohorezko Mailan, zehazki urriaren 23an Faduran, Complutense Cisneros arerio izango duela. Argazkian, Gernikako basurdeak / © Bizkaia Gernika Rugby taldea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun