Jaietako argazkiak batu eta zabaltzeari ekin dio Itzubaltzeta / Romoko jai batzordeak

Itzubaltzeta / Romo eta Pinuetako jaiak bukatu eta bi astetara dagoeneko martxan da berriz herri horretako jai batzordea. Datorren urteko jaiak prestatu baino lehen zuku guztia atera nahi diote jada amaitu berri direnei. Horrela, auzokide guztiei atera dituzten jaietako argazkiak eskatu dizkiete, ahal diren guztiak batu eta ondoren herritarren artean zabaltzeko. Horretarako, CDak, DVDak, pendrive delakoak edo paperezko argazkiak Kandilejas tabernan uzteko eskatu dute. Bestalde, urteroko ohiturari jarraituz, ostegunean herriko koadrilak batuko dira txikiteoan, Bilboko Aste Nagusirako jauzia egiteko. Hasieran hitzordua 20:00etan Kandilejas tabernan jarri bazuten ere, gaztetxeen aldeko Bilboko manifestazioa dela eta planteamendua aldatu dute. Horrela, 16:00etan Itzubaltzeta gaztetxean lotu dira, "bainujantzia jarrita", Bilbora joateko. Bestela, 20:00etan ere agertzeko aukera jarri dute, baina Bilboko Zazpi Kaleetako Unamuno plazan. Koadrila edota jaietako kamiseta jantzita agertzera deitu dute. Argazkian, Izkina, aurtengo jaietako koadrila irabazlea.