Erandioztar bat erreskatatu dute Pirinioetan

Mendi-ibiliak egiten zebilen A.A.C. 36 urteko emakume erandioztarra erreskatatu du gaur goizean Guardia Zibilak Pirineotako Sallent de Gallego udalerrian, Huescan (Aragoi). "El Periodico de Aragon" egunkariaren edizio elektronikoak zabaldu duenez, emakumeak koliko nefritikoa pairatu du bat-batean Sallent de Gallegoko Respomuso aterpearen inguruetan zegoela. Goizeko 10:30ak aldera horraino igo dira emakumearen bila zihoazen Guardia Zibileko espezialistak eta erandioztarra Jacako ospitalera eraman dute bertan arreta medikoa jaso dezan, Espainiako Gobernuak Huescan duen Azpiordezkaritzak zabaldutakoaren arabera. Argazkian, Huescako Guardia Zibilaren erreskate helikopteroa / cc-by-sa Fernando.