Ertzaintzak balizko "terrorismoaren goratze" delitua egotzi dio egunotan San Agustin jaiak burutzen dabiltzan Erandioko jai batzordeari. Herri horretako ezker abertzaleak UKBERRI.NETi adierazi dionez, poliziek jai batzordeko bi kide galdekatu dituzte Erandioko ertzain-etxean, Hegoalde kultur elkarteak jai-liburuxkan argitaratutako iragarkiaren gaineko azalpenak eman zitzaten. Publizitatean, besteak beste, Ekin erakunde politiko ilegalizatuko kidea izatea leporatu zioten eta Hegoaldeko bi bazkideren alaba den Erika Bilbao preso prebentiboaren argazkia, Arrano Beltza eta "Euskal presoak etxera!" leloa agertzen dira. "Dena oro har" delitua litzatekeelakoan dago Ertzaintza. Oraingoz auzia Bilboko epaitegi batera bideratu dutela azaldu du ezker abertzaleak. Epaitegi horrek kasua bertan behera utzi, bere gain hartu ala Espainiako Auzitegi Nazionalera igortzea erabaki dezake, ertzainen txostenak ikusi eta Fiskaltza zein auziperatuak entzun ostean. Hegoalde kultur elkarteak, iragarkia bere gain hartu, adierazpen askatasuna aldarrikatu eta "zentsura eta errepresioa" salatu ditu. Bitartean, jai batzordeak komunikabideei adierazpenik ez egitea deliberatu du. Argazkian, Erika Bilbao iazko irailaren 14an, atxilotu zuten guardia zibilez inguratuta.Ondoren, Erandioko udal ordezkari batek jai batzordeko kideengana zuzendu eta jai-liburuxkan "ez legezko kontuak egon zitezkeela eta horretaz Udala ez zela kargutuko" zinarazi zieten, beti ezker abertzaleak zabaldutakoaren arabera. Horren ostean, ezker abertzaleko kideak alkatearekin batzartu ziren, Udaltzaingoaren buruaren jardunaz eta jai batzordeari sinarazitako testuaren nondik norakoak ezagutzeko. Goikouriak ere "auto zentsura" bilatzen zuela diote, "kezka bakarra bere burua zuela".
Azkenean, jai-liburuxka banatzen hasi eta Ertzaintzaren galdeketa etorri zen, baina bitartean ertzainek ez dituzte beraien ustez delitu-ekintza diren aleak denda, taberna eta kaleetatik erretiratu. Erandioko jai batzordeak komunikatu bat irakurri zuen publikoki gertatutakoa salatzeko eta jai batzordeak inolako deliturik egin ez duela argi uzteko.
Hegoalde kultur elkartea, herriko tabernen auzian barnebilduta dagoena, harago joan da eta hainbat kartel zabaldu ditu herritik, "diktadurapean bezala, zentsura eta errepresioa" direla salatzeko. Horretaz gain, komunikatu publiko bat ere kaleratu du.
Hegoalde kultur elkartearen oharra
Jai batzordearen jazarpenaren aurrean, Hegoalde kultur elkarteak zera dio
Ertzaintzak Erandioko Jai Batzordeari egindako inputazio larrien aurrean zera esan behar dugu: iragarkiaren ardura gurea da, ez Jai Batzordearena. Beraz, utzi pakean Erandioko Jai Batzordea, lan bikaina egiten ari da eta.
Horretaz gain, iragarki honetan ipinitakoa berresten dugu, Erika Bilbao, Erandioko neska jatorra eta gure bazkide biren alaba, kartzelan egotea guztiz bidegabea dela pentsatzen dugulako.
Hemen jokoan dagoena adierazpen askatasuna da, gure iritzia emateko eta plazaratzeko askatasuna. Baina Patxi Lopezek, Rubalcabak eta bere poliziek euskal presoekiko elkartasun ahots guztiak isilarazi nahi dute, pertsona baten argazkia erakustea delitu izateraino absurdua asmatuz.
Espainiako kaleak Franco genozidaren izenaz beterik daudenean (Erandion ere badago frankisten izenak dituzten kaleak oraindik ere), guk ezin dugu gure elkartasuna azaldu eta euskal presoen egoera bidegabea salatu. Baina elkartasuna ez da delitua eta ez gara isilduko.
Hegoalde kultur elkartea
Hegoaldearen iragarkia
Hegoaldeak kaleratutako kartela
