Getxo Arraun Taldeak maila galdu zuen joan den igandean jokatu zen Santoñako ikurrinean. Hala ere, estropada puntuagarria ez izatea eskatu dute algortarrek, lehen kaletik joan ziren traineru guztiek bigarren kaletik joan zirenak baino 140 metro gehiago egin behar izan baitzuten, Getxoko Udalaren kirol albistegiaren arabera. Azaldu dutenez, proba hasi baino lehen klub batzuk konturatu ziren estropada eremua ez zela araudizkoa, lehen kalean itsasbide gehiago zelako bigarrenean baino. Getxo Arraunek eskatu zuen erlojupeko proba banan-banan egitea, baina epaileek ezetz esan zuten. Aurkaratzea onartuz gero, algortarrek KAE 1 ligan jarraituko lukete aste bat gehiagoz behintzat, kontutan hartuz, asteburu honetan jaitsiera-igoerako estropadak jokatuko direla. KAE 2 ligako Getaria eta Ondarroa KAE 1 azken aurreko tokian bukatu duenarekin lehiatuko dira KAE 1 mailako postu batengatik. Hala ere, maila mantentzea oso zail izango luke Getxo Arraunek, kontutan hartuz, Getaria egoera onenean dagoela, azken lehiatutako hiru estropadetan irabazi baitu. Baina, gutxienez, aukera bat izango lukete. Argazkian, "Goizeko Izarra" aurreko estropada batean.
Estropada aurrera joan ahala argi eta garbi ikusi zen lehen kaletik zihoazen traineruak bigarrenetik zihoazenak baino denbora kaskarragoak egiten ari zirela. Amaieran, lehenengo bost sailkatuak bigarren kaletik joan zirenak izan ziren: denek 18 minutuko baino gutxiagoko denbora egiten zuten. Lehen kaletik zihoan trainerurik hoberenak, "Donostiarra"-k, seigarren tokian bukatu zuen, 18 minutu eta segundo bateko denbora eginez. Hori ikusita, Getxo Arraunek eta Isuntzak beraien GPSen datuak alderatu zituzten: algortarrek 5.000 metroko tartea egin zuten eta lekeitiarrek 4.860 metrokoa. Luze bakoitzean 35 metro gehiago egin behar izan zituzten lehen kaletik zihoazen traineruek.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun