Jaialdia Korrontzi talde bizkaitarraren eskutik hasiko da. Horrek lehenengo aldiz eskainiko du "Urratsa", musika eta dantza uztartzen dituen ikuskizuna, hain zuzen. Emanaldian Oinkari dantza taldeak eta Igor Yebra dantzari famatuak jardungo dute. Euskal tradiziozko dantza eta egungo dantza nahastuko dituzte Korrontziren musikarekin, trikitilarien tradizioan oinarrituta, mandolinen, haize eta egungo musika tresnen doinuez aberastuta.
Bigarren egunean, The Unusual Suspects folk orkestra eskoziarra izango da protagonista. Areetara bere azken lanarekin datoz: "Big Like This", alegia. Beraien jarduera 2003an hasi zen, Celtic Connections jaialdian eta, handik gutxira tradiziozko eskoziar musikaren eszenako musikari ospetsuak bildu zituen. Taldean Anna Massie, Ewan Robertson, Rory Campbell eta Aidan O'Rourke artista famatuak aritu dira, besteak beste. Bere saioetan tradiziozko tresnen doinuak haize instrumentuen, atal erritmikoen, pianoaren eta arparen erritmoekin nahasten dira. Horrela, taldeak eskoziar tradiziozko musika eraldatzea lortu eta horren bilakaera bultzatu du.
Larunbatean, irailak 10, Aljeriako Idir kantautorearen abestiez gozatzeko aukera egongo da. Ipar Afrikako musikaren funtsezko artista eta Imazighenetarren (Atlaseko mendikatean eta Cabilian bizi den tribua, eskualde horretako kanturik zaharrenen jabeak) doinuen erakuslea. Idir musika modernoaren aitzindaria eta aita da, baita hainbat korronteren bultzatzailea ere. Berberiako jendeen ahotsa berreskuratu zuen eta bere herriko musika eszena goitik behera aldatu zuen, 70eko hamarkadan musikaren munduan abiatu zenetik.
Azkeneko egunean, irailak 11, Dulce Pontesek amaiera bikaina emango dio Getxo Folk jaialdiari. Artista portugaldarra fadoko ahots garrantzitsuetako bat da eta musika-mota horren berpizkundearen eragileetako bat. Bere musika soinu tradizional portugaldarretan murgiltzen da haiek berritzeko eta berrasmatzeko, baina haiei darien hunkiberatasuna galdu gabe.
Doako ekitaldiak
Arratsaldeko kontzertuetan eskaintza anitzaz gozatu ahal izango dute zaleek. Horietan, Tambor de Saia taldearen erritmo brasildarrak, Seafoi taldearen (Mendebala jaialdiaren Maketa Lehiaketako irabazlea) doinu zeltak, Josemi Carmonaren (Ketama) flamenko proiektu berria eta Maria Berasarte abeslari donostiarraren fadoaren omenezko saioa izango dira protagonistak. Munduko Terrazan, berriz, hiru saio izango dira: Audience Plays Amerikanuak taldeak Ipar-Amerikara emigratu zuten euskaldunen inguruko dokumental baterako idatzitako abestiak eskainiko ditu; Ruaille-Buaille euskal-irlandar taldeak erritmo zeltak ekarriko ditu; eta azkenik, jatorri anitzeko musikariak biltzen dituen Felah Mengus taldeak flamenkoan eragina izan duten doinuak azalduko ditu.
Jarduera osagarriak
Bisitariek Elkartasun Gunea bisitatu ahal izango dute: Iparraldea eta Hegoalde arteko bidezko merkatua sustatzen duen ekimena, hainbat GKEen lankidetzarekin antolatuta. Bestalde, Munduko Merkatua topagune bilakatuko da hainbat herrialdeetan egindako artisau-produktuak atsegin dutenentzat. Halaber, Euskadiko Munduko Medikuak elkarteak eta Getxoko Etorkinen Plataformak antolatutako Munduko Terrazak aukera ezin hobea eskainiko du beste kulturetako gastronomiaz gozatzeko, musika ona entzuten den bitartean. Azkenik, Getxoko Immigrazio eta Kulturartekotasun Unitatearen eskutik, aurten ere kultura arteko espazioa hartuko du Folk Getxo BBK jaialdiak. Bertan, erakunde horrek gauzatutako ekimenak eta etorkinei eskaintzen dizkien zerbitzuak aurkeztuko dira; baita erakunde publikoek bultzatutako programak ere.
Getxo Folk jaialdian arituko diren artista nagusiak (© Getxoko Kultur Etxea)
Irailaren 8an hasi eta lau egunez, munduko doinuak protagonista bilakatuko dira XXVII. Folk Getxo BBK jaialdian. Bertan, maila handiko talde eta artistek jardungo dute: Dulce Pontes abeslari portugaldarra, The Unusual Suspects big-band eskoziarra, Idir eskarmentu handiko kantautore aljeriarra eta , besteak beste. Azken horrek lehenengo aldiz aurkeztuko du "Urratsa" dantza eta musika ikuskizuna, Igor Yebra dantzariarekin eta Oinkari dantza taldearekin elkarlanean lehenengo egunean. Guztira, jaialdia irauten duen bitartean, 13 kontzertu izango dira eta, horiekin batera, Munduko Azoka, Elkartasunaren Gunea, Munduko Terraza, kale-banden desfileak eta beste hainbat ekitaldik osatuko dute egitaraua. Aurten, jaialdiak bi kokapen izango ditu. Areetako Xake plazan saio nagusiak izango dira 21:00etan (igandean, ordubete lehenago hasiko da). Bertan ere haurrentzako kontzertuak izango dira, 12:30ean. Bestetik, plaza horren ondoan dagoen aparkalekuan arratsaldeko saioak izango dira 19:00etatik aurrera (igandean, 18:00etan) eta Munduko Terrazako kontzertuak, 23:00etan. Ohi denez, saio guztiak doakoak izango dira, kontzertu nagusiak izan ezik. Argazkian, Korrontzi / © Getxoko Kultur Etxea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun