Manu Etxebarria Getxo Rugby Taldeko presidente zenari azken agurra emango diote astelehenean
Getxo Rugby Taldeak eta Imanol Landa Getxoko alkateak bere doluminak agertu dituzte Jose Manuel Etxebarria Gangoitiren heriotzagatik. Bart zendu da 1995etik 2007ra bitartean udaletxean EAJko zinegotzia eta alkateorde izandakoa eta 2009ko uztailetik hona Getxo Rugby Taldearen presidentea zena. Etxebarriak 73 urte zituen eta azken hilabeteetan minbiziaren aurka borrokan zebilen, Getxo Rugby Taldeak zabaldu duenez. Elizkizunak astelehenean egingo dituzte, Algortako Trinitarioen elizan, arratsaldeko 7:30ean. Argazkian, Manu Etxebarria 2009ko klubeko hauteskundeetan presidente aukeratua izan ondoren / © Getxo Rugby Taldea.
Landak bere egin du familiaren atsekabea eta, era berean, nabarmendu nahi izan du “Ogasun zinegotzi eta alkateorde bezala hiru legegintzalditan zehar Getxoren alde egindako lana, baita udalerriko gizarte eta kirol alorretan izandako parte-hartzea ere". "Honi esker gizon maitatua eta oso estimatua izan da politikarientzat, Udaleko beharginentzat eta, oro har, herritarrentzat. Bere konpromisoaren adibidea da Getxo Rugby Taldearen lehendakaritza bereganatu eta bere alde azkeneraino egin duela lan. Bere jarrera bateratzailea eta bere jokatzeko eta lan egiteko era eredugarri eta ondare izan bitez geratzen garenontzat”, gaineratu du agintari getxoztarrak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun