Zabaletak adierazi du batzarrak hauteskundeetara EArekin, Alternatibarekin eta ezker abertzalearen beste sentsibilitatearekin joateko proposamena berretsi badu ere, “proposamen hori Nafarroa Baiko beste kideei eta beste indar aurrerakoiei” irekitako proposamena dela; “Nafarroa Bairen historian beti gertatu den bezala”.
Aralarren koordinatzaile nagusiak azpimarratu du Aralarrek proposamen hori kudeatuko duela Hegoalde osoan eman ahal izan dadin. “Nafarroan bere izena izango du eta bere berezitasunak izango ditu. Nafarren erabakia errespetatuko da politikoki. Aralar da nafarren defendatzailerik sutsuena bere duintasun politikoari dagokionean, baina uste dugu berezitasun horiek bateragarriak direla akordio orokorrago batekin, beste batzuetan gertatu den bezala”.
Aralarren Hegoaldeko Batzarrak, zuzendaritza batzordeak datorren azaroaren 20ko hauteskundeetan elkarrekin parte hartzeko EArekin, Alternatibarekin eta ezker abertzalearen beste sentsibilitatearekin lortutako aurreakordioa berretsi du botoen %61,4ko babesarekin. Batzarrean parte hartu duten militanteen %35,09 proposamena berrestearen aurka azaldu da, %3,07 abstenitu egin da eta bozen %0,44 zuria izan da. Hegoaldeko Batzarrak zuzendaritzak aurkeztutako txosten politikoari egindako zuzenketak eztabaidatu ditu; eztabaida anitza eta aberasgarria izan da. Aralarreko koordinatzaile nagusiak, Patxi Zabaletak, jakinarazi du bozketaren emaitzaren balorazio “oso positiboa egin behar dela. Eztabaida aberasgarria izan da, baina akordioaren edukia ezin dugu publiko egin iruditzen zaigulako gainontzeko indarrekin batera egin beharreko gaia dela”. Argazkian, Aralarren Hegoaldeko Batzarra / © Aralar.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun