Gabi Basañez eta Askapeneko beste lau kide epaitzeko auzibidea abiatu dute Madrilen
Espainiako Auzitegi Nazionaleko Pablo Ruz epaileak Gabi Basañez Ruiz algortarra, Walter Wendelin, Unai Vazquez Puente, David Soto Aldaz eta Aritz Gamboa de Miguel Askapena erakunde internazionalistako kideak prozesatzeari ekin dio gaur, auto baten bidez. Halere, magistratuak ez du epaiketaren data zehaztu. Berria.info-k jakinarazi duenez, epaiketa abiatzeko erabakian ETAren zuzendaritzapean egotea leporatzen dio Ruzek Askapenari. Zehazki, Askapena ETAren eta Batasunaren zuzendaritzapean ei zegoen Nazioarteko Lan Talderen parte zela eta bere egitekoa ETArentzako nazioarteko babesa lortzea zela dio epaileak. Auziperatutako lagun guztiak 2010eko irailaren 28an atxilotu zituzten, Askapenaren aurkako sarekadan, Itsaso Lekuona eta Ruben Sanchezekin batera. Argazkian, Gabi Basañez pasa den apirilaren 2an, askatu zuten egunean.
Hiru egun beranduago espetxeratu zituzten gaur auziperatuak. Basañez pasa den apirilaren 2an kaleratu zuten eta harrera jendetsua egin zioten Algortan. Bi egun beranduago, ordea, Basañez agurtu zuten Sopelako auzokideen aurka oldartu zen Ertzaintza. Ruzek, gaurko autoan artxibatu egin du Itsaso Lekuona eta Ruben Sanchez, Uberka Bravo, Aitziber Martinez, Beatriz Ilardia, Humberto Trapero eta Naroa Iturriren aurka abian zituen ekinbideak. Naroa Iturri Hamaika Telebistako esatariaren kasuak agerian uzten du auzia zelan eraman den. Izan ere, UEU unibertsitatean Askapenako hitzaldi batean moderatzaile jardun izan zuen Iturrik. Bestalde, Dignidad y Justicia elkarte ultraeskuindarrak Ruben Sanchez ere auziperatzea eskatu du.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun