Pertsona bi eraman behar izan zituzten Gurutzetako ospitalera pasa den larunbatean, Erandion izandako auto-istripua dela eta. "Que! Nervion egunkariak" zabaldu duenez, istripua arratsaldeko 3ak baino lehen jazo zen Bi-738 errepidean, Erandioko udalerrian. Bertan, 26 urteko emakumezkoa eta 34 urteko gizonezkoa zauritu ziren eta Gurutzetako ospitalera eraman zituzten osasun arreta har zezaten. Errepidea ordu batez itxi behar zuten Getxorako noranzkoan. Halere, ez da hori Erandiok azkenaldian pairatu duen istripu bakarra. Pasa den asteazkenean, 8:45ak aldera, lau autoen arteko talka izan zen Bi-637 errepidean, Kukularra inguruan. Istripu ikusgarria izan arren, zauritu bakarra suertatu zen. Nahiz eta zauri arinak izan gizonezkoa Gurutzetara eraman zuten. Bost kilometrotako auto ilarak sortu ziren ordu batez ingurua garbitzen amaitu arte. Argazkian, Ertzaintzaren trafiko kontrol bat, artxiboko irudian / cc-by Irekia.net.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun