Besteak beste, Joseba Markaida Berangoko PSE-EEren zinegotziaren etxearen aurkako eraso bat planifikatu izana leporatzen diete gazteei. Auziperatuek, Eleak mugimenduak, Gazte 1+ Ez! plataformak eta AAMk behin eta berriro salatu dute auzia politikoa dela eta "inkomunikazio aldian torturen bidez eragindako autoinkulpazioetan oinarritzen" dela. Gaur, bihar eta etzi gazteei elkartasuna adierazteko eta auzia salatzeko elkarretaratzeak egingo dituzte Algortako Telletxe plazan, 20:00etan. Ostiralean, ordea, manifestazioa izango da leku beretik 19:30ean.
Fiskalaren eskaerak, hainbat komunikabideren arabera
• 13 urte eta 11 hilabete: Mikel de Gregorio, Josu Rodriguez.
• 9 urte: Aner Mimenza.
• 7 urte eta 120.000 euro: Jon Rosales.
• 7 urte: Zigor Goikoetxea.
• Zabaltzeke: Joseba Elorriaga, Mikel Rekarte, Lander Labajo, Txomin Gezuraga, Batxi Galdiz eta Gorka Oribe.
Espainiako Auzitegi Nazionalean gaur eta asteazkena bitartean epaitzen dituzten Algorta, Getxo eta Berangoko 11 gazteek ukatu dute ETArekin, ezker abertzaleko erakundeekin edota kale erasoekin inolako loturarik izatea, EFE albiste-agentziak zabaldu duenez. Epaiketa gaur goizean abiatu da, akusatuen tokian Mikel de Gregorio, Joseba Elorriaga, Mikel Rekarte, Josu Rodriguez, Aner Mimenza, Lander Labajo, Txomin Gezuraga, Zigor Goikoetxea, Batxi Galdiz eta Gorka Oribe jesarri direla. Jon Rosales, ordea, espetxeratutako auziperatuen kabinatik jarraitu du bista. Gazteek haien abokatuen galderei baino ez diete erantzun, fiskalaren tesiak ezeztatzeko. Horrela uko egin diote 2004 eta 2007 urteen artean kale erasoetan parte hartu izanari, ETAko kide izateari edota legez kanpoko beste erakundeetan militatzeari. Fiskaltzak 7 urte eta 13 urte eta 11 hilabete bitarteko espetxe zigorrak eskatzen ditu hamaikakoarentzat, guztira 128 urte. Argazkian, auziperatuek ostiralean emandako prentsaurrekoa.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun