Miliaren aurkezpen ekitaldian, Alvaro Gonzalez tokiko kirol zinegotziak aipatu duenez, “2008an proba antolatzeari berriro ekin ondoren, gure kirol egutegi aberatsaren parte bat bihurtu nahi den lasterketa da eta, aldi berean, urteko egun jakin batean atletismoko eliteko atleta ospetsuak bildu nahi ditugu”. Azkenik, zinegotziak proban parte hartzera animatu nahi izan ditu herritarrak. Antolatzaileek 250 bat lagun parte hartzea espero dute.
Itxartu Taldearen izenean, Rikardo Ansotegik nabarmendu du kirol lasterketa hobetzen doala urtetik urtera eta horren adierazgarri dela Espainiako Atletismo Federazioaren Milia garrantzitsuenen zerrendan Getxokoak gora egin duela 2008az geroztik, "36garrenetik iazko urtean 21garrena izatera iritsi arte". Ansotegik gogoratu duenez, "lasterketaren helburua berau finkatzea, eta atletismoaren praktika sustatzea da, udalerria bultzatu eta Bizkaiko herritar guztiei kirol ikuskizun bat eskaintzea, Udalak berak dituen jasangarritasun politikak gune publikoak erabiliz bultzatzearekin batera”.
Lasterketan parte hartuko dutenek 1.600 metro inguruko distantzia bete beharko dute, 353 bat metroko zirkuituari lau itzuli eta erdi emanez. Algortako Telletxe kalean izango dira irteera eta helmuga. Probaren zehaztasun teknikoak Dimas Ramos Getxo Atletismo Taldeko arduradun nagusiak eskaini ditu. Antolatzaileek sari bereziak emango dituzte probako errekorrak gainditzen dituztenei.
Izen-ematea
Lasterketarako izen-ematea doakoa da eta interesatuek itxartu.itxartu[abildua]gmail.com edo itxartu.itxartu[abildua]gmail.comhelbide elektronikoetan zein Gaztañaga Kirolak eta Kantxa Kirol Moda dendetan egin ahal izango dute; hilaren 23ra arte, edota irteeran bertan proba bakoitza abiatu baino ordu erdi lehenago.
Zirkulazio neurri bereziak
Lasterketa dela eta, horrek hartuko duen esparrua, hau da, Amezti eta Euskal Herria kaleetako bidegurutzetik Sarrikobaso eta Algortako Etorbideko bidegurutzera arteko eremua itxita egongo da ibilgailuentzat, 11:30etik 13:15era arte.
Larunbat honetan, hilak 24, Espainiar Estatuko atleta nagusiak bilduko dira Algortan Getxoko Miliaren bosgarren edizioan. Gauzak horrela, Arturo Casado, 1.500 metrotan iazko Europako txapelduna; Zacarie El Mazouzzi, iazko edizioaren irabazlea; Eliseo Martin; Maica Rodriguez; Beatriz Valiente; zein Betit Solar arituko dira aipatu proban, besteak beste. Getxo Atletismo Taldeak eta Itxartu Taldeak antolatuta, Algortako erdigunean egingo dute korrika, 11:45etik aurrera. Lasterketa irekia da eta gizonezko zein emakumezkoen maila ezberdinak izango dira, txikien eta benjaminen mailetatik elite mailara non, aipatutako korrikalari nagusiez gainera, euskal eliteko ordezkari bat ere izango den. Horien artean, Ivan Fernandez, Iñigo de la Granja eta Iñigo Artabe egongo dira gizonezkoetan, besteak beste. Emakumezkoetan, berriz, Iraia Garcia, Maite Areiza eta tokiko Leire Medina arituko dira. Argazkian, Rikardo Ansotegi Itxartukoa, Dimas Ramos Getxo Atletismokoa eta Alvaro Gonzalez kirol zinegotzia gaur egindako aurkezpenean / © Getxoko Udala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun