Sopelako Sekeko Gaztetxeak iraileko martxa hartuta dauka jadanik. Gauzak horrela, larunbat honetan, irailak 24, jai irlandarra ospatuko dute, Belfastetik propio ekarriko dituzten musikari eta hizlariarekin. Azken orduko aldaketak izan ezean, jardunaldia arratsaldeko 6etan hasiko da, mapen eta argazkien dokumentala eta erakusketa direla medio. 19:30ean, berriz, "Okupatutako 6 konderrien egoera soziopolitikoa eta bake prozesuaren gorabeherak" hitzaldia eskainiko du Tommy Gorman-ek. Gorman IRAko kide izandakoa da, Belfastekoa, preso ohia eta ideologia sozialistakoa. Irish Republican Writers Group taldean kokatu zen eta "Fourthwrite" eta "The Blanket" aldizkarietan idatzi du. 21:00etan jIrlandako jaki tradizionalak dastatzeko aukera izango da. Ordu bete beranduago, Belfastetik propio etorritako Caoimhin Mgc eta Sharon Morgan-ek kontzertua emango dute. Horretaz gain, arratsaldean zehar, mozorro lehiaketa izango da, irlandar jatorrenak uhartetik ekarritako sari berezia jasoko duela. Azkenik, musika eta edari gaeliko tradizionalak izango dira. Argazkian, Sekeko gaztetxea / © Gazte Asanblada Sopeloztarra.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
