Getxoko Udalak auzoko ostalarien eskaera hartu du kontuan tabernak ixteko ordua atzeratzeko erabakia hartzerakoan. Horiek, egun bizi duten eta aurtengo udan euskal kostaldean izandako eguraldi txarraren eraginez okertu den egoera ekonomikoan oinarritu dute beren eskaera, “uste dugu babes horrek hilabete txar horiei aurre egiten lagun gaitzakeela”, adierazi dute auzoko ostalariek.
Josu Loroño zinegotziak aipatu duenez, "ohartu gara bizi duten problematikaz. Are gehiago kontuan hartuta sektore horrek langile ugari dituela Getxon". Era berean, gogoratu duenez, Udalak hainbat ekimen abiatu ditu herriko denda, taberna eta jatetxetan aberastasuna sortzeko asmoz. Izan ere, neurri bereziak hartu dira, hala nola, ostalaritzako saltoki berriak ipintzeko ordenantzen malgutzea; zarama tasa %35ean murriztea; terrazak ipintzearen bermatzea; herriko erdigunetan oinezkoentzako guneak egokitzea; merkataritza eta ostalaritza dinamizatzeko kanpainak; eta bisitariak erakarri eta merkataritza zein ostalarien jarduera laguntzeko kultura eta kirol ekitaldiak antolatzea.
"Sektorea laguntzeko ekimen honekin batera, Udalak herritarren atsedenerako eskubidea babesteko lanean jarraituko du. Egun jakin batzuetan zentzuzko oreka mantentzea da helburua, baina horrek ez du esan nahi jaietan zein beste une batzuetan jokatzen ari garen moduan ez dugunik jokatuko. Esparru horietan tabernen jarduera arautzen duten ordenantza eta dekretuak bete daitezen zorrotz jokatuko dugu”, jakinarazi du Loroñok.
Asteburu honetan, Areetako Mesedeetako jaiak direla eta, tokiko tabernek ordubete beranduago ixteko aukera izango dute. Getxoko Udalak aipatu neurria hartu du herri horretako ostalariei laguntza eskaintzeko asmoz, "eguraldi txarraren eraginez aurtengo uda kaxkarra izan delako ekonomikoki". Neurri berbera hartu zuten ere jaiak ospatu dituzten gainontzeko herri eta auzoetan. Hala ere, ezarritako ordenantzak bete daitezen, tokiko Udaltzaingoak zein Babes Zibila aparteko lana egingo dute jaiak irauten duten bitartean. Horren harira, aurtengo jaietan 58 espediente ireki dituzte hainbat arau ez betetzeagatik. Argazkian, Areetako jaietan ohiko ekimena da barraskiloen txapelketa gastronomikoa.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun