Lehenengoak proposamena egiten PPkoak izan ziren. Orain hamar egun, Bozeramaileen Batzordean eztabaidatzeko zirriborroa aurkeztu zuten Marisa Arrue eta Eduardo Andrade zinegotziek. Horren bidez, Udalbatzako galde-eskeen txanda arautu nahi zuten popularrek, auzotarren parte-hartzeari tarte gehiago emanez. Popularren iritziz, auzokide bakoitzak bost minutuko tarte bat izan beharko luke galdera edo eskea aurkezteko eta alkateak bere iritzia edo informazioa agertu ondoren beste bi minutuko txandaz gozatzeko aukera izan beharko luke, gauzak argitu, zehaztu edo alkateari erantzuteko. Halere, udal mandatariak eztabaida itxiko luke bigarren solasaldi batez. Alkateari ere denbora mugatzea mahai gainean jarriko zutela agindu zuen Andradek, lortuko zuteneko uste osorik gabe.
Nahiz eta Udalbatzari begirako proposamena jada agertu, PPk lanean jarraitzen du parte hartzeari buruzko ordenantzak osatu aldera. Besteak beste, Udal erabakiak deszentralizatzeko barrutien sorrera hartuko lituzke ordenantza horiek. Pasa den legealdian egin zuten barrutien proposamena Udalbatzan.
PSE-EEren proposamena
Bitartean, PPkoen asmoa ezagutu eta hiru egun beranduago, pasa den astean, Luis Almansak aireratu zituen auzotarren parte-hartzea zabaltzeko bere asmoak, biharko Udalbatzara mozio baten bidez eramango dutena. Zehazki, Informazio Batzorde Berezia eratu nahi dute, udal kontuetan eta udal aurrekontuen prestaketetan hiritarrek esku har dezaten, aurrekontu parte-hartzaileak eratu aldera. Informazio batzorde horren kideek talde politikoen bozeramaileek aukeratuko lituzkete, behin behinean, PSE-EEren diseinuaren arabera, eta horiek izango lituzketen eskuduntzak eta funtzionamendua zein behin betiko partaideak abenduko udal bilkuran onartuko lirateke behin betiko.
Apartheid-en ostean hiritarren parte-hartzea bultzatu nahi dute Getxoko PPk eta PSE-EEk
Bihar, asteartearekin, ikasturte berriko Getxoko Udalbatzaren lehenengo bilkura burutuko da, 2003tik hona Espainiako Alderdiaren Legeak baztertutako hautetsirik egongo ez den lehen ikasturteari abiada emango diona, alegia. Getxo Bizia herri plataformak lehenengo eta Eusko Abertzale Ekintzak ondoren apartheid-a salatu zuten urte horietan eta, bestelako heldulekurik ez zutela topatu, auzotar guztiei irekitako parte-hartze zirrikitu txikien bidez saiatu ziren udal erabakiak ezagutzen eta fiskalizatzen, nabarmenena Udalbatzaren galdera eta eskeen txanda izan zela. Horren aurrean, alderdi konstituzionalistek muzin egin zioten txanda horri eta ezker abertzalekoek hitza hartzearekin batera aretotik irteten ziren. Hainbat auzo elkartek, baina, haiek ere entzun gabe joaten zirelako kexatu zen eta PSE-EEk eta PPk bertan behera utzi behar izan zuten estrategia hura. Orain, Bilduren bitartez ageriko "apartheid"-a bukatu dela, auzotarrei udalaren ateak irekitzeko proposamenak egin dituzte popularrek eta sozialdemokratek. Argazkian, Marisa Arrue eta Eduardo Andrade parte hartzeko proposamena azaltzen.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun