Ibilgailuak erosteko inbertsioa 120.000 eurokoa izan da. Diruaren %80 Bizkaiko Foru Aldundiaren Ingurumen Sailak emandako diru-laguntzaren bitartez lortu dute. Gerora, autoen mantenu mekanikoa urteko 30.000 eurokoa izango dela kalkulatu dute. Ukanauto 24 orduz erabilgarri egongo da urteko egun guztietan, zehaztu gabeko jai egunetan izan ezik. Mankomunitateko arduradunen ustez, langile autonomoentzat oso onuragarria izan daiteke zerbitzua, baita ibilgailurik ez daukaten edo gutxi erabiltzen duten gidarientzat. Horretaz gain, noiz behinka beste auto bat behar duten familiei mesede egingo die. Adituen arabera, urteko 2.500 euro artekoa ere izan daiteke aurrezpena.
Nola erabili
Lehenik eta behin izena eman behar da, 946 123 959 telefono zenbakiaren bidez edo www.ukanauto.com webgunean. Horretaz gain, 2011ko abendura bitartean, 10 euroko kuota ordaindu beharko da. Hurrengo urteetan 30 euro izango dira, 12 hilabeteko. Aseguruaren kostua, mantenua, azterketak, garbiketa eta erregai depositua barne hartzen ditu salneurriak.
Eguneko edozein ordutan erreserbatu ahal izango dira autoak, erabaki baino hamabost minutu lehenago ere bai. Hori egiteko iraupena eta kotxea jasotzeko ordua zein lekua zehaztu beharko dira, kotxea aukeratzearekin batera. Alokairua hilabetero fakturatuko dute. Kostua orduko 3 euroko izango da, kilometro bakoitzeko 0,22 euro gehituta ibilgailu hibridoetan; eta 0,24 euro gasolinakoetan. 23:00etatik 07:00etara bitartean, ez da orduko tarifarik aplikatuko, kilometroen araberakoa bakarrik.
Ukanauto, ibilgailuak alokatzeko zerbitzu publikoa abian jarri du Uribe Kostako Mankomunitateak. Berango, Sopela, Urduliz, Barrika, Gorliz, Plentzia eta Lemoizek autoak jasotzeko toki bana izango dute. Orotara, Toyota markako zazpi auto daude erabilgarri: horietatik bost hibridoak, eta gainontzeko biak kontsumo baxukoak. Dagoeneko Europako hainbat herrialdeetan dago erabilgarri aipatu zerbitzua. "Car Sharing" izenarekin ezaguna da, Alemania, Austria, Suiza, Holanda edota Erresuma Batuan. Berotegi efektua eragiten duten gasen isurketa murriztuz, "ingurumen onurak" lortu gura dituzte ekimenarekin; baita "baliabideen erabilera egokia eta kontsumo arduratsua sustatu, eta ingurune garbia eta osasungarria bermatzea" ere, tokiko arduradunek zehaztu dutenez. Argazkian, erabiltzaileetako bat Ukanauto zerbitzuaren txartela eskuan / © Uribe Kostako Mankomunitatea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun