Leioako Udalak martxan jarri ditu Ikea zonaldeko bi igogailuak. Egitasmoak 645.940,45 euroko kostua izan du eta Ikea bera, Mendibil, San Juan eta Iturribideko eremu baxua eta altua azpiegitura horien bitartez lotzea ahalbidetzen du. Zonaldean bizi diren 3.000 familien bizi kalitatea nabari hobetuko du, Eneko Arruebarrena alkate jelkidearen arabera. "Mugikortasun arloan egokiena izan da igogailu bi jartzeko erabakia, mugikortasun araudia modu egokienean betetzen duen proiektua izanik. Honetaz gain, igogailuek zonalde guztiaren erdialdean kokatzen dira guztientzako erosoa izateko, eta bide batez zonaldean dagoen 20 metrotako malda gainditzen duelako", gaineratu du udal agintariak. Argazkia: © Leioako Udala.
Arruebarrenak gogoratu duenez, gaur egun Ikean martxan dagoen konexio mekanikoa osagarria da duela hiru urte Bidekurtzion jarritako pasabidearekin. Azken horrek Txomin Aresti eta Kandelazubietako zonaldea lotzen du Bidekurtzio plazarekin oinezkoen mugikortasuna erraztuz. Bestaldeko aukerak ere aztertu izan ziren, alkateak onartu duenez. Adibidez, eskailera mekanikoak. "Baina, inguruko herrietan izandako arazoak direla eta, baztertu egin zen aukera hori; batez ere gutxitasun fisikoa eta organikoa duten pertsonen federazioa den Fekoor-en arbuioak ikusirik, baita Justizi Auzitegiak eskailera hauen kontrako jarrera azaltzen zituzten erabakiak ere", azaldu du agintariak. Horien ustez, eskailera mekanikoak ez omen dira aukera ona gutxitasun fisikoa duten pertsonentzat, ezta adibidez umeen kotxeentzat ere. Bestalde, maldak egitea ere baztertu zen, batez ere gaur eguneko kalearen zati oso garrantzitsua hartzen zituztelako. "Honek aparkalekuen gutxitzea ekarriko luke. Gainera, oinezkoak gora eta behera joateko malda bi beharrezkoak ziren eta aukera hori bideraezina zen kale honetan", Arruebarrenaren arabera.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun