Irailaren 30etik urriaren 14ra bitartean aurkeztu ahal izango dituzte familia getxotarrek 2011-2012ko ikasturtean seme-alaben eskolako gastu orokorrentzako diru-laguntzak lortzeko eskaerak. Helburu horretara 246.650 euro bideratu ditu Getxoko Udalak. Aipatu subentzioek udalerrian gutxienez 2011ko urtarrilaren 1ko antzinatasunez erroldatuta dauden eta adin txikiko seme-alabak dituzten pertsonek eskatu ahal izango dituzte. Umeak eskolaratuak eta gurasoen etxe berean erroldatuta egon beharko dute, haien antzinakotasun berdinarekin, eta Lehen Hezkuntzatik (hiru urte) DBH (barne) arteko ikasketak egiten egon beharko dute. Ume bakoitzeko eskaera bakarra egin ahal izango da. Bakoitzak 30 eta 90 euro artean jasoko ditu, umeak egiten dituen ikasketen mailaren eta erroldatutako etxebizitzaren katastroko balioaren arabera. Argazkia: cc-by-sa Valakirka.
Eskabide-orriak, osorik beteta, udaletxeko erregistro orokorrean edo herritarren arretarako edozein bulegotan aurkeztu beharko dira. Eskaera eta aipatu bulegoetan edo www.getxo.net-en lor daitekeen deklarazio-orriarekin batera, honako hauek aurkeztu beharko dira: eskatzailearen DNIaren fotokopia, familia liburua laguntza eskatzen den alaba edo semearen datuekin, eta umeak ikasten duen eskolako egiaztagiria.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun