Ikasturte honetan, irteerak elkarrekin antolatzen hasi dira Egizu! eta Aitxu! euskara taldeak. "Irteera hauetan edozein euskaldunek har dezake parte. Gure helburuak dira Sopela eta Getxoko euskaldunok elkar ezagutzea, berbalagunon arteko zubiak eraikitzea, eta eskualdean dugun ondareaz jabetzea (naturala, historikoa, arkitektonikoa…) beti ere euskararen bidetik", azaldu dutenez.
Hona hemen Josu Larrañaga Algortako berbalagunak prestatutako testua:
“Uribe Kostan hiru portu nagusi ditugu: Armintza, Plentzia eta Algortakoa. Portuak, eremu zabal baten atariak dira: itsasotik beste herri batzuetako produktuak etorri zaizkigu. Berrikuntza ugari iritsi dira itsasotik. Arrainak ere portuetan lehorreratzen dira. Portuetatik ere erasoak heldu dira…
Hiru portu, dozenaka bizibide: Armintza arrantzale-herria izan da, Plentzia nabigatzaile edo marinelena, eta Algortan ez da falta izan piloturik.
Berbatxango honetan gure portuen iragana eta oraina ezagutuko ditugu. Garena ulertzeko izan ginena gogoratuko dugu, itsasoa, lan egiteko lekua izatetik aisialdirako gune bihurtu dugun honetan”.
Eskualdeko portuak eta arrantza ezagutzeko berbatxangoa prestatu dute Egizuk eta Aitxuk
Urriaren 9an, igandea, hurrengo txangoa egingo dute Getxo udalerriko eta Sopelako berbalagunek, hurrenez hurren, Egizu! eta Aitxu! euskara taldeek antolatuta. Oraingo honetan, gure eskualdeko portuak, arrantza eta lehengo bizimodua ezagutuko dituzte. Horrenbestez, goizeko 9etan abiatuko da autobusa Kirikiñotik, Algortatik, ordu laurden beranduago berbalagun sopeloztarrak hartzeko. Adinez nagusiek 3 euro ordaindu beharko dituzte. Umeek, ordea, dohainik izango dute garraioa. Gaineratu dutenez, mokadua ere eskainiko diete guztiei. Aldez aurretik izena eman beharko da, Sopelako Aitxu! taldean (aitxuizuba@gmail.com) edo Getxoko Egizu! elkartean (www.egizu.org / 619 935 541). Argazkian, Egizu!-ko hainbat berbalagun Baltzolan egindako txango batean / cc-by Egizu.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun