Uda amaituta, Pinosoloko igerileku irekiak itxi egingo direla aprobetxatuko du Leioako Udalak, kirol gune horretan dauden padel pistak hobetu eta 2012ko urtarrilean ireki ahal izateko. Horretaz gain, kanpoaldean dagoen skate pistak ere hainbat aldaketa izan ditu azken egunetan, erabiltzaileen beharrizanetara hobeto egokitzeko. Pinosolo kirol guneko padel pistetan egingo diren aldaketak urte osoan erabilgarriak izateko asmoarekin burutuko dira, hots, estali egingo dira eta argiztapena areagotuko da zonaldean, Eneko Arruebarrena alkateak atzo jakinarazi zuenez. Modu honetan, neguko egun euritsuetan ere erabilgarriak izango dira pistak. Horrez gain, erosoago bihurtzeko, aldagelak eta komunak jarriko dituzte pisten alboan. Obrak datorren astean hasiko dira eta, aurreikuspenen arabera, 2012ko urtarrilean amaituta egongo dira. Hau guztia aurrera ateratzeko 536.000 euro bideratu ditu Udalak. Argazkian, gazte bat patinatzen Leioako skate pistan / © Leioa.net.
Horrekin batera, Pinosoloko kirol gunearen kanpoaldean dagoen skate pistan ere berrikuntzak egin dira. "Ekipamenduaren erabiltzaileen eskaerei erantzunez", Udalak pistaren azalera handitu du eta "oztopo" gehiago jarri ditu pistan. Hori posible izateko pistaren alboan ziren kanastak eta pin-pon mahaiak kendu dituzte. "Aldaketa hauekin skate pistaren erabilgarritasuna handitu da eta erabiltzaileen beharrizanetara egokitu da", Arruebarrenaren hitzetan. Pistan jarri diren oztopo berriak ondokoak dira: plano inklinatua, "pun-box", piramidea, zintarri anitzak, plano inklinatuen "planter"-a, "spine street", "quarter"-a eta hiru zintarri. Obrak amaitzear egin arren, skate pista ez dute datorren aste bukaerara arte zabalduko; pintura behar bezala lehortu arte, alegia. Hobekuntza obra horien aurrekontua 113.610 eurokoa izan da.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun