Ertzaintzak 24 urteko gazte bat atxilotu zuen atzo goizean Erandioko nekazaritza-inguru batean. Bertan, Herrizaingo Sailak zabaldutakoaren arabera, mutilak marihuana plantazio bat zeukan. Bertsio ofizialaren arabera, etxe baten ondoko lur-sailak zabaltzen zuen usaina izan zen bertatik pasa zen polizia patruila baten susmoak piztu zituen zantzua. Ertzainek ingurua arakatzeari ekin ziotenean gazteak lur-sailetik alde egin zuen auto batez. Ertzainek autoa gelditu eta miatu eta gaztea identifikatu zuten. Ibilgailuan, marihuana landatzeko hainbat liburu topatu zituzten. Horren ostean, lur-saileko etxola irekitzeko epai-agindua eskatu zuten. Bertan, 19 landare, 60 lorontzi eta marihuana landatzeko hainbat tresna bahitu zituzten. Gaztea ertzain-etxera eraman, gai estupefazienteen trafiko delitua egotzi eta epailearen esku utzi zuten. Ertzaintzaren arabera, droga trafikoagatik aurrekariak ei ditu atxilotuak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun