Munduko hirugarren Natalia Rodriguezek parte hartuko du biharko Berangoko Milian
Urtero bezala, iraupen erdiko gai mailako lasterkariak batuko dira larunbatean Berangoko Miliaren 24. edizioan. Beraien parte-hartzea baieztatu dute jada Jesus España Europako txapeldunordea 5.000 metroetan eta 2005etik hona zazpi aldiz Espainiako txapeldun izandakoak, Manuel Olmedo Europako txapeldun estalitako 1.500 metroetan eta Daeguko (Hego Korea) munduko txapelketan laugarren sailkatu zenak, eta Arturo Casado 1.500 metroetako Europako azken txapeldunak. Daegun, 1.500 metroetako brontzezko dominaren irabazle Natalia Rodriguez ere Berangon izango dela jakinarazi dute antolatzaileek. Hain zuzen ere, gaur bertan, oinarrizko atletismoari buruzko hitzaldia eskainiko dute Olmedok, Casadok eta Rodriguezek. Solasaldia 19:30ean izango da Berangoetako kultur etxean. Aurten, gainera, arraun munduko Jose Luis Kortari gorazarre egingo dio Berango Atletismo Taldeak. Argazkian, Natalia Rodriguez / cc-by-sa Albarinm.
Aipatu atleten artean ondokoak ere izango dira Berangoko Nazioarteko Milian: Rui Silva portugaldarra, Zacarie El Mazouzzi marokoarra, Juan Carlos Higuero, Francisco Javier Abad, Diego Ruiz, Ivan Fernandez, Zulema Fuentes-Pila, Isabel Macias, Iris Fuentes-Pila, Jacqueline Martin, Beatriz Antolin, Paula Gonzalez Berodia, Irene Pelayo, Belit Solar, Pilar Alonso eta Marta Tigabea Mekonen etiopiarra. Konfirmatzeke dago oraindik Mo Farah britainiarra, 5.000 metroetako munduko txapelduna.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun