Lantzarteko zelaiaren salmenta geldiarazi du Berangoko Udalbatzaren gehiengoak
Hainbat auzokidek Lantzarteko zelaiaren salmentaren kontra aurkeztutako alegazioak aintzat hartu zituen atzoko osoko bilkuran Berangoko Udalbatzaren gehiengoak. Gauzak horrela, bertan tasatutako 80 etxebizitza eta aparkalekuak eraikitzeko egitasmoa geldiarazi dute. Bilduk gogoratu duenez, "hauteskundeetarako hamar egun falta zirenean, EAJk ezohiko udal batzarra deitu zuen Lantzarteko landa saltzeko, orduan zeukan gehiengo absolutuaz baliatuz". Orduan bezala, bozketan PSE-EE izan zuten bidelagun jelkideek. Bildu Udalbatzara helduta, baina, beraien bozak ez dira nahikoak izan. Aurreko agintaldian bezala PPk eta Ezker Batuak ere egin zuten etxeak eraikitzearen kontra, auzokideek aurkeztutako helegiteen alde bozkatuz. Zazpi boto seiren kontra, beraz. Argazkian, Lantzarteko auzokideen protesta maiatzaren 12ko udal batzarrean.
Ildo berean, Lantzarteko zelaiari erabilera publikoa ematea aldarrikatu du Bilduk, plazaratutako oharrean, "kirol eta kultur erabilera izango duena, auzoa eta ondorioz herria biziberrituko duena". Gainera, auzi honetarako ez ezik, HAPOren kasuan ere herri-kontsulta antolatzera gonbidatu du Udala koalizioak. "Udalean hartzen diren erabaki guztiek herriaren hitza izan behar baitute beti oinarri. Hori dela eta, benetan espero dugu aurrerantzean horrelako egoeretara heldu behar ez izatea, herritarren borondatea kontuan hartzen ez denean sortzen baitira horrelako hika-mikak. Partehartzea sustatuz, Berango denon artean eta denontzat eraiki behar dugu", adierazi dutenez.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun