Bateragune auzian zigortutako herritarren askatasuna eskatzea onartu du Plentziako Udalbatzak

Bateragune auziaren inguruko adierazpen instituzionala aurkeztu zuen Plentziako Bilduk, atzo egindako udal osoko bilkuran. Koalizioko iturriek adierazi dutenez, beraien ordezkarien hiru botoekin onartu egin zen proposamena, EAJ eta Isamari Zarauza alkatearen Independenteak abstenitu egin baitziren. Batetik, "gatazkaren irtenbidea sustatzeko, dagokion jarduera instituzionalean urratsak emateko konpromisoa hartzera" premiatu dute Udala. Bestalde, epaiketa politikoak behin betikoz alde batera utz daitezela eskatu dute, "zabaldu den garai berriari jarri nahi zaizkion oztopoekin amaituz". Azkenik, Bateragune auzian inplikaturik dauden kide guztien berehalako askatasuna eta absoluzioa exijitu dute. Argazkian, Bateragune auziko epaiaren aurkako elkarretaratzea, Algortan.