Joan den osteguneko osoko bilkuran, gidabaimena ateratzeko azterketa euskaraz egiten duten gazteei diru-laguntza ematea onartu zuen Sopelako Udalbatzak. Eskatzaileak udalerrian erroldatutako 17 eta 23 urte bitarteko neska-mutilak izango dira (1988-1994 bitartean jaiotakoak). Bete beharreko baldintzak ondokoak dira: batetik, gidabaimena ateratzeko azterketa euskaraz egin beharko dute eta Trafiko Zuzendaritzak ziurtatu beharko du horrela izan dela. Bestalde, Gidabaimena Euskaraz kanpainan parte hartu duen autoeskolaren batean atera beharko da gidabaimena. Gainera, eskaria aurkeztu orduko, matrikula ordainduta eduki beharko da. Azkenik, diru-laguntza eskatu ahal izateko azterketa teorikoa eginda izan behar da. Argazkian, gidabaimena euskaraz ateratzeko eskuliburu bat.
Diru-laguntza matrikula ordaintzeko izango da eta hor ez dira azterketa tasak sartuko. Diru-laguntzetarako mugak hurrengoak izango dira: lehenik eta behin, azterketa teorikoa euskaraz egiteagatik eskatzaileak matrikularen %75a jaso ahal izango du, gehienez 150 euro. Bigarren, azterketa praktikoa euskaraz egiteagatik eskatzaileak lehen eskola praktikoa doan jaso ahal izango du, gehienez 50 euro. Udalak jakinarazi duenez, Sopela inguruan hiru dira Gidabaimena Euskaraz ekimenean parte hartzen ari diren autoeskolak: Sopelana autoeskola, Kaiku Sopelan eta Urdulizen, eta Uribekosta Sopelan eta Plentzian.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun