Eskolak euskaraz ematen dituzten akademien berri emango du sarean Getxoko Udalak
Getxo udalerriko akademiek euskaraz duten eskaintza ezagutzera eman du Udalak, Interneten agerian jarritako argitalpenaren bidez. Ekimena GEHI Getxon euskara sustatzeko hitzarmenaren barruan kokatzen da, establezimendu horien datuak jaso eta getxoztarrei liburuxka batean helarazte aldera. "Eskolatik edo lanetik kanpo egin nahi diren aisialdiko ekintzak euskaraz ere egin daitezkeela jakinaraztea da ekimenaren helburua", tokiko iturriek aipatu dutenez. Era horretan, "Udalak zubi-lana egiten du eskaintza euskaraz duten akademiei buruzko informazioa eskatzen duten pertsonen eta horrelako zentroen artean". Argazkian, mutiko bat biolina jotzen / cc-by-sa Luistxo eta Marije.
Aurten, bigarren aldiz, liburuxka hori "flipping book" (liburu elektronikoa) erakoa izango da. Horren berri emateko Udalak Getxoko 2 eta 16 urte bitarteko ume eta gazteren familien etxetara 6.664 postal bidaliko ditu, sarean ikusi ahal izateko helbidearekin: www.getxo.net/akademiakeuskaraz. Foileto horretan 27 akademia eta horien eskaintza agertzen dira. Gehienek ume eta gazteentzako eskolak edo ekintzak eskaintzen dituzten arren, helduentzat ere hainbat eskola daude (musika, dantza, pintura, euskara). Hain zuzen ere, eskaintza honako bost multzo nagusi hauetan sailkatuta dago: 11 akademiek errefortzu-eskolak eskaintzen dituzte HH, LH, DBH, Batxilergo eta unibertsitateko ikasleentzat; 6 euskara eskolak dira, hizkuntza bera ikasteko, EGA edo hizkuntza-eskakizunak prestatzeko; 3 musika eskolak dira; 4 pintura, eskulanak eta dantza eskolak; eta 3 (Uztarri) umeentzako euskaltegiak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun