Zenet artista malagarrak “Musika arimarekin” zikloa irekiko du ostiral honetan. Aldi berean, programa horrek Kultur Leioako musika denboraldia inauguratuko du. Ziklo horrek lau kontzertu izango ditu, talde parte-hartzaileen nortasunak eta musika-estilo zainduak markatutakoak, tokiko arduradunek nabarmendu dutenez. Etzi, urriak 7, Zenetek eskainiko duen kontzertuan boleroak, tangoak, jazza, swinga eta flamenkoa izango dira entzungai. Limurtzeko botere handiarekin eta talentu naturalarekin, ikus-entzuleak liluratuko ditu eszenatokitik. Saio guztiak 21:00etan izango dira. Sarrerei dagokienez, 22 eurotan egongo dira. Hala ere, 66 eta 75 eurotako bonoak ere badaude, leihatilan galdetuta. Argazkian, Zenet bere taldearekin kontzertuan / cc-by alterna2.
Hilaren 21ean, Mira Awad abeslari eta kantautore palestinarrak “All my faces” lan berria aurkeztuko du. Noarekin sarritan elkarlanean dabilen emakume polifazetiko honek mezuz eta sentimenduz beteriko ahots pertsonala erakutsiko du. Azaroaren 11n, Kroke & La Musgaña taldeen txanda izango da. Polonia eta Gaztela eta Leongoak dira hurrenez hurren, zeintzuek talentua bat egitea erabaki duten, beraien herrietako soinuak azalarazteko. Azkenik, azaroaren 25ean, OqueStrada taldeak emango dio amaiera denboraldiari. Talde horrek Portugaleko zapore eta usain guztia dakar “Tasca Beat, The Portuguese dream” diskoan, Lisboako zein hiri inguruko soinu tradizionalarekin.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun