Nafarroatik zuzendutako operazio honetan speed kilo ugari atzeman ditu poliziak, Juan Luis Perez Martin Guardia Zibileko koronelak adierazitakoaren arabera. Elma Saiz Gobernuko ordezkariaren hitzetan, oso operazio "garrantzitsua" izan da gaurkoa. Operazioa Ertzaintzaren laguntzarekin burutu dute eta, atzemandako drogak 2,5 milioi euroko balioa izan dezake merkatuan, polizia iturriek diotenez. Operazio honekin, desegintzat jo dute droga sintetiko trafikoan aritzen zen sare bat. Kide gehienek garraioaren munduan lan egiten zuten eta, ikerlarien arabera, bide komertzialak erabiltzen zituzten droga garraiatzeko, Nafarroa, EAE, Errioxa eta Kantabria helburu. Ikerketari esker sarearen droga biltegi nagusia topatu ei dute, Barakaldoko industriagune batean. Atxiloketei dagokienez, 11 Nafarroan egin dituzte (2 Funesen, 1 Milagron, 7 San Adrianen eta 1 Azkoienen), bat Errioxan (Kalagorrin), bi Bizkaian (Leioan eta Barakaldon) eta bat Kantabrian (Ramales de la Victorian).
Ertzaintzak eta Guardia Zibilak kaleratutako bideoa
Leioan atxilotu dute droga sintetiko trafikoan aritzen zen sareko ustezko kideetako bat
Guardia Zibilak eta Ertzaintzak 15 pertsona atxilotu dituzte gaur, drogen aurkako operazio batean, Nafarroan, Errioxan, Bizkaian eta Kantabrian. Horietako bat Leioan atzeman dute eta bere etxea ere arakatu egin dute, Eusko Jaurlaritzaren Herrizaingo Sailak zabaldutakoaren arabera. Atxilotuetatik 11 espetxera bidali dituzte jada, baina polizia iturriek ez dute zehaztu leioaztarra horien artean dagoen. Miaketetan, agenteek 124 kilo droga atzeman ei dituzte: 50 kilo speed puru; 74 kilo speed manipulatu; kilo 1 kokaina; 13,5 kilo haxix; 6,6 kilo marihuana; 6.000 estasi pilula eta 3 gramo kristal. Luxuzko lau ibilgailu, bi motozikleta, Taser pistola bat eta munizioa ere atzeman omen dituzte. NASCAR izeneko operazioa Lizarrako Epaitegitik zuzendu dute, eta horretan 100 agentek parte hartu dute.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun