EBBren presidentearen esanetan, Patxi Lopez EAEko egungo agintariak “mesede eskasa” egiten dio lehendakariaren figurari “gaur eta bihar eskumenak nahastearekin egiten duen horrekin”; zentzu horretan ere “bere burua errespetatzea” eskatu dio Lopezi. Lehendakariaren figuraren “duintasuna eta begirunea” eta ondorioz, kargu hori hartzen duen “pertsona orori zor zaiona”. Zentzu honetan esan du bere alderdiak “lehendakariaren figura errespetatzen jarraitzen duela, kargu hori batak zein besteak hartu”, baina “horretarako ere, unean uneko lehendakariak begirune hori zaindu behar du eta bere kargua errespetatu behar du”.
Erreforma fiskala
Urkulluk baieztatu duenez bere alderdiak “ez du inolako arazorik” erreforma fiskalaren inguruan hitz egiteko, baina “behar den moduan eta toki egokian” hitz egin behar dela gaineratu du. Jelkideak kritikatu egin du Lopezek zerga erreformaren markoan Eusko Jaurlaritza Zerga Koordinaziorako Organoan “okupa” ote den esanda eragin duen polemika. Lehendakariak organo hau aipatu izanak poztu duen arren, Urkulluk gogoratu nahi izan du Eusko Legebiltzarrera eraman nahi den planteamendua egin duela. “Eta gaur hori zuzendu behar izan du, tonua goratuta eta lehendakariari ez dagozkion terminoetan hitz eginez”, gaineratu duenez.
Jose Antonio Agirre eta Lekube Eusko Jaurlaritzaren lehenengo lehendakariaren zin egitearen 75. urteurrena ospatzeko asmoz, lore eskaintza egin du gaur goizean Getxoko alkate (1931-1933) izan zenaren estatuaren ondoan, Bilboko Ertzilla kalean, Euzko Alderdi Jeltzaleak. Ekitaldian parte hartu dute Iñigo Urkullu EAJren EBBko presidenteak, Jose Luis Bilbao Bizkaiko ahaldun nagusiak, Juan Maria Atutxa Eusko Legebiltzarreko lehendakari eta Herrizaingo sailburu ohiak, Josu Erkoreka Espainiako diputatuak eta Andoni Ortuzar BBBren lehendakariak. Urkulluk Agirre omentzeko ekitaldiaren inguruan gogora ekarri nahi izan duenez, “duela 75 urte, Agirre lehendakariaren izendapenarekin eta Eusko Jaurlaritza osatzearekin batera hasi genuen prozesu jatorra Euskadi instituzionalizatzeko, Euskadi urratsez urrats egiteko, abertzaleok nahi dugun moduan gaur ezagutzen duguna baino handiagoa izan dadin” eta “aniztasun, irekitasun eta Euskadi kanpoan zabaltzeko konpromisoarekin”. Bitartean, Patxi Lopez buru zela, EAEko Gobernu Kontseilua Gernikako juntetxean bildu da, 1936ko urriaren 7an lehenengo Jaurlaritza osatu zela oroitzeko. Argazkian, EAJko hainbat buruzagi Agirreren estatuaren aurrean / © EAJ.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun