Astearte honetan, urriak 11, ostiraleko lan-istripua salatzeko elkarretaratzea egingo du Metro Bilbaoko enpresa batzordeak. Hitzordua 11:30ean jarri dute konpainiako bulego nagusiaren aurrean, Bilboko Nafarroa kaleko 2. zenbakian. Euskal Trenbide Sarea egiten ari den 3. lineako obretan izan zen ezbeharra. Horren ondorioz Estructuras Cosvimar enpresako langile bat hil zen, 52 urteko E.E.B. gizona. Gauzak horrela, zenduaren familiari, lagunei eta lankideei elkartasuna eta babesa adierazi die Metro Bilbaoko enpresa batzordeak. Horretaz gain, Euskal Trenbide Sareari zein garraio konpainiako arduradunei "hiriarteko trena eraikitzeko obretan prebentzio-neurri egokiak eta beharrezkoak aplikatzen direla bermatzea" eskatu diete. Administrazioei, berriz, "herri lanetan halakorik berriro ez gertatzeko neurri eraginkor eta benetakoak hartzea" galdegin diete. Argazkian, LABek deituta, lan-istripuen kontrako elkarretaratzea eskualdean / © Sopela.net.
Metro Bilbao garraio enpresako langileek ordezkariek gogoratu dutenez, aurten lan-ezbeharretako 47. heriotza dugu Euskal Herrian, eta hiriarteko trenaren eraikuntzan 1992tik gaur arteko zazpigarrena. Hori dela eta, bertoko "instalazioetako obretako lan-ezbeharren odolustea gelditzeko" eskatu dute, baita Euskal Herriko lantoki guztietakoa ere. "Ez ditugu odol eta minez altxatutako lantokiak nahi", azpimarratu dutenez. Datozen egunotan dolu eta aldarrikapenerako deituta dauden mobilizazioetan parte hartzera deitu dituzte behargin guztiak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun