Txilinbueltaka programak bere azken irteera prestatu du jada. Hondarribira egingo dute bidai 1999 eta 2004 bitartean jaiotako Leioako ume euskaldunek, azaroaren 11tik 13ra bitartean. Izen-emate epea urriaren 19tik 26ra arte egongo da zabalik, Kultur Leioan dagoen Euskara Zerbitzuan, goizeko 9:00etatik 14:00etara. Udal arduradunek gogoratu dutenez, irtenaldiak kopuru mugatua du. Beraz, zenbat eta arinago inskribatu hobe. Izena emateko erantsita dagoen dokumentua (pdf) bete behar da eta Osakidetzako txartelaren fotokopia aurkeztu. "Ezin dugu ahaztu, ekintza honen helburua aisialdian euskarazko gune bat izatea da. Beraz, egitarau honetan parte hartzen dutenek gaitasun nahikoa beharko dute egun horietako elkarbizitza euskaraz egiteko", adierazi dutenez. Argazkian, Hondarribia / cc-by-nc-sa Iñaki Arrieta Baro.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun